عدنان صدیقی کا خواتین کے بارے میں بیان سن کر حیرانی ہوئی: مشی خان
پاکستان شوبز انڈسٹری کی معروف اداکارہ مشی خان کا کہنا ہے کہ اُنہیں خواتین کے بارے میں عدنان صدیقی کا بیان سن کر حیرانی ہوئی۔
مشی خان نے فوٹو اینڈ ویڈیو شیئرنگ ایپ انسٹاگرام پر اپنے ساتھی اداکار عدنان صدیقی کے خواتین کے بارے میں دیے حالیہ بیان پر اپنے ردِعمل کا اظہار کیا ہے۔
اُنہوں نے کہا کہ کبھی کبھی انسان کو ایسی عجیب و غریب چیزیں سننے کو ملتی ہیں جو کہ اسے حیرت میں ڈال دیتی ہیں اور خاص طور پر اس وقت جب وہ کسی ایسے شخص نے کہیں ہوں جن سے آپ نے توقع نہیں کی ہوتی۔
اداکارہ نے کہا کہ ابھی میں عدنان صدیقی کا خواتین کے بارے میں بیان سن کر کافی حیران رہ گئی کیونکہ وہ سینئر اداکار ہیں اور ایک ہفتہ پہلے اُنہیں ’پرائیڈ آف پرفارمنس‘ ملا تو میں بہت خوش ہوئی تھی۔
اُنہوں نے کہا کہ عدنان صدیقی نے ایک اعلیٰ ایوارڈ حاصل کرنے کے بعد اس طرح کی بات کی تو مجھے بڑی حیرانی ہوئی کیونکہ اس مقام پر پہنچنے کے بعد انسان کو مذاق بھی بہت سوچ سمجھ کر کرنا چاہیے۔
مشی خان نے ہنستے ہوئے کہا کہ وہ تو شکر کریں کہ شو کی میزبان میں نہیں تھی، اگر میں ہوتی تو شہد کی مکھی بن کر آپ کو ڈنک مار دیتی کہ پھر آپ کو سوجن ختم کرنے کے لیے دوائی لینی پڑتی۔
اُنہوں نے سوالیہ انداز میں مزید کہا کہ عورتوں کا موازنہ کبھی بھی مکھیوں سے نہیں کیا جاسکتا، کس نے آپ کو اس طرح کی مثال دی ہے؟
