عریشہ رضی خان کے ولیمے کی تصاویر و ویڈیوز وائرل ہوگئیں

حال ہی میں شادی کے بندھن میں بندھنے والی اداکارہ عریشہ رضی خان کے ولیمے کی تصاویر و ویڈیوز سوشل میڈیا کی زینت بن گئیں۔

فوٹو اینڈ ویڈیو شیئرنگ پلیٹ فارم انسٹاگرام پر اداکارہ کی شادی کی تقریبات کے سلسلے میں آخری تقریب یعنی دعوتِ ولیمہ کی خوبصورت تصاویر و ویڈیوز وائرل ہو رہی ہیں۔

ولیمے کی اس تقریب میں بطور چائلڈ اسٹار شہرت حاصل کرنے والی عریشہ رضی نے ہلکے گلابی و سرمائی امتزاج کی فرشی میکسی کا انتخاب کیا جبکہ دولہا عبداللہ فرخ روایتی انداز اپناتے ہوئے سیاہ سوٹ بوٹ اور دلہن سے میچنگ گلابی ٹائی میں نظر آئے۔

شادی کی تقریبات کے سلسلے میں ہونے والی آخری تقریب میں شوبز ستاروں نے بھرپور شرکت کرکے تقریب کو چار چاند لگا دیئے۔

شادی کی دیگر تقریبات کی طرح ولیمے کی تقریب میں بھی خوب ہلہ گلہ کیا گیا اور روایت سے ہٹ کر اس موقع پر ڈانس پارٹی بھی ہوئی۔

واضح رہے کہ عریشہ رضی خان کے نکاح کی خبر نکاح کے تقریباً ڈیڑھ برس بعد جولائی 2022 میں اس وقت سامنے آئی تھی جب ان کا فوٹوگرافر کے ساتھ بغیر اجازت تصاویر و ویڈیوز سوشل میڈیا پر شیئر کرنے کے باعث تنازع کھڑا ہوگیا تھا۔