سوہانی بھٹناگر کی اچانک موت پر عامر خان کی ٹیم کا اظہارِ افسوس
بالی ووڈ کے مسٹر پرفیکشنسٹ عامر خان کے ساتھ مشہور فلم ’دنگل‘ میں کام کرنے والی اداکارہ سوہانی بھٹناگر کی 19 سال کی عمر میں اچانک موت پر عامر خان کی ٹیم نے افسوس کا اظہار کیا ہے۔
عامر خان کی ٹیم نے سوشل میڈیا ویب سائٹ ایکس پر اپنے تعزیعتی پیغام میں لکھا ہے کہ ہمیں سوہانی بھٹناگر کے انتقال کے بارے میں سن کر بہت دکھ ہوا ہے، ہم ان کی والدہ پوجا جی اور پورے خاندان سے دلی تعزیت کا اظہار کرتے ہیں۔
تعزیتی پیغام میں مزید لکھا ہے کہ سوہانی بھٹناگر جیسی باصلاحیت اور ٹیم پلیئر نوجوان لڑکی کے بغیر فلم ’دنگل‘ ادھوری تھی۔
عامر خان کی ٹیم نے پوسٹ کے آخر میں لکھا کہ سوہانی بھٹناگر ہمیشہ ہمارے دلوں کا تارہ رہے گی۔
واضح رہے کہ سہانی بھٹناگر نے عامر خان کی سُپر ہٹ فلم ’دنگل‘ میں اُن کی بیٹی ببیتا کماری کے بچپن کا کردار ادا کیا تھا، دنگل کے بعد سہانی بھٹناگر نے اداکاری سے وقفہ لے لیا تھا کیونکہ وہ اپنی پڑھائی پر توجہ دینا چاہتی تھیں۔
تاہم آنجہانی اداکارہ کے اہل خانہ کے مطابق 2 ماہ قبل اداکارہ (Dermatomyositis) نامی نایاب بیماری میں مبتلا ہوئی تھیں جو جِلد پر خارش اور پٹھوں کی کمزوری کا باعث بنتی ہے جس کی تشخیص اداکارہ کی موت سے صرف 10 دن پہلے ہی ہوئی تھی۔
