میں نے اپنا گیم پلان کنڈیشنز کے مطابق بنایا، وینڈر ڈوسن

لاہور قلندرز کے بیٹر رسی وینڈر ڈوسن نے کہا ہے کہ میں نے اپنا گیم پلان کنڈیشنز کے مطابق بنایا۔

لاہور میں پشاور زلمی کے خلاف دلچسپ میچ کے بعد پریس کانفرنس کرتے ہوئے رسی وینڈر ڈوسن نے کہا کہ کرکٹ انفرادی گیم نہیں یہ ٹیم گیم ہے، میں نے اپنا گیم پلان کنڈیشنز کے مطابق بنایا۔

انہوں نے کہا کہ پشاور زلمی کے صائم ایوب نے اچھی بیٹنگ کی اور ہمیں دباؤ میں رکھا، نوجوان کرکٹر اعتماد کے ساتھ کھیلا۔

رسی وینڈر ڈوسن نے مزید کہا کہ ہم نے 2 مرتبہ چیمپئنز ٹرافی جیتی ہے، ہم نے ہر میچ میں 100 فیصد دیا، پی ایس ایل ایک ٹف لیگ ہے کوئی بھی ٹیم ہار سکتی ہے اور کوئی بھی جیت سکتی ہے۔

ان کا کہنا تھا کہ کچھ چیزیں ہمارے حق میں نہیں گئیں لیکن میں کوئی معذرت پیش نہیں کر رہا، کارلوس بریتھ ویٹ یا سکندر رضا کو نہ بھیجنے کا فیصلہ غلط نہیں تھا۔

یاد رہے کہ پشاور زلمی کے خلاف 212 رنز کے ہدف کے تعاقب میں ڈوسن نے 52 گیندوں پر 104 رنز کی ناقابل شکست باری کھیلی۔

یوں وہ موجودہ پی ایس ایل میں پہلی سنچری بنانے والے کھلاڑی بھی بن گئے۔