اُردن کیخلاف میچ کیلئے قومی ٹیم کا تربیتی کیمپ شروع
فیفا ورلڈ کپ کوالیفائر ٹو میں اُردن کے خلاف میچ کےلیے پاکستان فٹ بال ٹیم کا تربیتی کیمپ لاہور میں شروع ہوگیا، دونوں ملکوں کے درمیان میچ 21 مارچ کا اسلام آباد کے جناح اسٹیڈیم میں کھیلا جائے گا۔
اردن کیخلاف میچ کی تیاری کیلئے قومی ٹیم کا تربیتی کیمپ لاہور کے مقامی اسکول کے گراؤنڈ میں شروع ہوگیا، کھلاڑیوں نے قومی ٹیم کے ہیڈ کوچ اسٹیفن کانسٹینٹائن کی نگرانی میں ٹریننگ کی۔
اس موقع پر کیمپ میں فٹنس کوچ کلاڈیو الٹیری اور گول کیپنگ کوچز راموس اور نعمان ابراہیم بھی موجود تھے۔
قومی ٹیم کا تربیتی کیمپ آئندہ چند روز لاہور میں جاری رہنے کے بعد اسلام آباد منتقل ہوجائے گا جہاں پاکستان اور اُردن کا میچ 21 مارچ کو اسلام آباد کے جناح اسٹیڈیم میں شیڈولڈ ہے، یہ میچ دن دو بجے کھیلا جائے گا۔
