آسٹریلیا کے فاسٹ بولر مچل اسٹارک، آئی پی ایل کی تاریخ کے سب سے مہنگے ترین کھلاڑی

انڈین پریمیئر لیگ (آئی پی ایل) کے نئے سیزن کا آغاز 22 مارچ سے ہو رہا ہے جس میں کئی غیرملکی کھلاڑی ایکشن میں نظر آئیں گے۔

بھارتی میڈیا کے مطابق اس مرتبہ آئی پی ایل کی تاریخ کے سب سے مہنگے ترین کھلاڑی آسٹریلیا کے فاسٹ بولر مچل اسٹارک ہیں جنہیں کولکتہ نائٹ رائیڈرز نے 24.75 کروڑ بھارتی روپے میں اپنی ٹیم کے لیے منتخب کیا ہے۔

بھارتی میڈیا کے مطابق اس مرتبہ آئی پی ایل میں سب کی نظریں مہنگے ترین مچل اسٹارک پر ہوں گی اور وہ اتنی بڑی قیمت میں ٹیم میں شامل ہونے کی وجہ سے دباؤ میں ہوں گے تاہم بھارت کے سابق کرکٹر گوتم گمبھیر کو ایسا نہیں لگتا۔

بھارتی میڈیا کے مطابق کولکتہ نائٹ رائیڈرز کے مینٹور گوتم گمبھیر نے کہا ہے کہ مجھے نہیں لگتا ہے مچل اسٹارک کے لیے اتنی بڑی قیمت کا کوئی اضافی دباؤ ہوگا۔

کولکتہ پہنچنے کے بعد میڈیا سے گفتگو کرتے ہوئے گوتم گمبھیر نے کہا کہ مجھے امید ہے کہ مچل اسٹارک کولکتہ نائٹ رائیڈرز کے لیے وہی کریں گے جو وہ آسٹریلیا کے لیے کرتے ہیں۔

گوتم گمبھیر نے کہا کہ میں نے ہمیشہ کہا ہے کہ کولکتہ نائٹ رائیڈرز میرے لیے فرنچائز نہیں ہے بلکہ جذبات ہیں، میں واپس آ کر خوش ہوں۔

واضح رہے کہ گوتم گمبھیر کی کپتانی میں کولکتہ نائٹ رائیڈرز ماضی میں آئی پی ایل جیت چکی ہے، وہ 2017ء میں فرنچائز سے علیحدہ ہوگئے تھے۔