اسلام آباد ایئر پورٹ پر پی آئی اے کی پرواز سے پرندہ ٹکرا گیا
اسلام آباد ایئر پورٹ سے کوئٹہ کے لیے روانہ ہونے والے پی آئی اے کے طیارے سے پرندہ ٹکرا گیا تاہم طیارہ اور مسافر محفوظ رہے۔
ترجمان پی آئی اے کے مطابق پی آئی اے کی پرواز پی کے 325 اسلام آباد سے کوئٹہ کے لیے روانہ ہوئی تو طیارے کے بلندی پکڑنے کے دوران پرندہ ٹکرا گیا۔
ترجمان کا کہنا ہے کہ ایئر ٹریفک کنٹرول سے رابطہ کرنے پر اے ٹی سی نے پائلٹ کو واپس لینڈ کرنے کی ہدایت کی۔
طیارے نے ٹیک آف کے 50 منٹ بعد اسلام آباد ایئر پورٹ پر باحفاظت لینڈنگ کی، مسافروں کو متبادل طیارے سے منزل پر روانہ کیا گیا۔
پی آئی اے کے ترجمان نے کہا کہ اسلام آباد ایئر پورٹ پر طیارے کے انجن نمبر 2 سے پرندہ ٹکرایا، پرندہ ٹکرانے سے انجن کے بلیڈز کو نقصان پہنچا، طیارے کو گراؤنڈ کر دیا گیا، انجینئرز کی ٹیم انجن کی مرمت کا کام کر رہی ہے۔
