ہجرت سے متعلق لیون چہار دہم کے موقف کو  ہسپانوی کمیشن برائے مہاجرین کی مدد تنظیم نے سراہا 

سی ای اے آر (ہسپانوی کمیشن برائے مہاجرین کی مدد) اور ایکسم نے ہسپانوی پارلیمنٹ (کانگریس آف ڈپٹیز) میں پوپ لیون چہار دہم کی ہجرت کے حوالے سے تقریر کو سراہا ہے، جس میں انسانی وقار کو مرکزی حیثیت دی گئی۔

اس حوالے سے سی ای اے آر کی ڈائریکٹر جنرل مونیکا لوپیز نے گفتگو کرتے ہوئے پوپ کے اس پیغام سے اتفاق کیا کہ ہجرت کی پالیسیوں کی بنیاد انسانوں اور ہجرت کی بنیادی وجوہات پر ہونی چاہیے۔ ان کے مطابق یہ تقریر پوپ کے سابقہ بیانات کے مطابق ہی تھی۔

انہوں نے اس بات پر بھی خوشی کا اظہار کیا کہ ہجرت پوپ کے ایجنڈے میں ایک اہم مقام رکھتی ہے۔ پوپ جمعرات کو کینری جزائر کا دورہ کریں گے، جہاں وہ ہجرت کی صورتحال کا جائزہ لیں گے۔ وہ بارسلونا سے گران کیناریا جائیں گے اور اگلے دن تینیرائفے پہنچیں گے۔

دوسری جانب ایکسم نے بھی اس بات کو سراہا کہ پوپ نے ان وجوہات کی سنگینی کو اجاگر کیا جو لوگوں کو ہجرت پر مجبور کرتی ہیں، اور ان کے حل کی ضرورت پر زور دیا۔ تنظیم نے اس بات سے بھی اتفاق کیا کہ لوگوں کو اپنی جان خطرے میں ڈالنے سے بچانے کے لیے محفوظ اور قانونی راستے فراہم کیے جائیں، خاص طور پر کینری راستے جیسے خطرناک سفر کے تناظر میں۔

مزید برآں، ایکسم نے اس بات پر زور دیا کہ مہاجرین کے لیے ایسا استقبال ہونا چاہیے جو ان کے معاشرے میں انضمام کو فروغ دے، نہ کہ ان کے خلاف نفرت یا مجرمانہ رویوں کو بڑھائے۔ انہوں نے پوپ کا شکریہ ادا کیا کہ انہوں نے اپنے خطاب میں انسانی وقار، امن اور مکالمے کو مرکز میں رکھا۔

پوپ نے پیر کے روز پارلیمنٹ میں سینیٹرز اور ارکان اسمبلی سے خطاب کرتے ہوئے کہا کہ “ہجرت کا المیہ آج دنیا کے ضمیر اور بین الاقوامی نظام کی اخلاقی بنیاد کو جھنجھوڑ رہا ہے” اور اس کے لیے ایسی حکمت عملی درکار ہے جو انسانوں کو سامنے رکھے، ان وجوہات کو سمجھے جو انہیں اپنے وطن چھوڑنے پر مجبور کرتی ہیں، اور محض نقل و حرکت کے انتظام تک محدود نہ ہو۔

انہوں نے مزید کہا کہ اس سے “سماجی انصاف کی دوہری ذمہ داری” جنم لیتی ہے: محفوظ اور قانونی راستوں کی فراہمی، باعزت استقبال، اور معاشرے میں حقیقی انضمام کے مواقع۔

پوپ کے مطابق، “بہت سے مرد، خواتین اور بچے مشکل حالات کے باعث اپنے گھروں، پیاروں اور ماضی کو چھوڑنے پر مجبور ہوتے ہیں۔ یہ مسئلہ صرف معاشی یا آبادیاتی نہیں بلکہ ایک گہرا اخلاقی اور قانونی معاملہ ہے۔ جہاں بھی کسی فرد کے ساتھ اس کی قومیت، نسل، مذہب، زبان یا معاشی حیثیت کی بنیاد پر امتیاز برتا جاتا ہے، وہاں انسانی مساوی وقار کے اصول کی سنگین خلاف ورزی ہوتی ہے۔”

انہوں نے اس صورتحال کی “بہت بھاری قیمت” پر افسوس کا اظہار کیا، جو اکثر نظرانداز کی جاتی ہے، اور انسانی اسمگلنگ میں ملوث مافیا کے خلاف کارروائی کے ساتھ ساتھ متاثرین کی مدد اور ریسکیو کو مضبوط بنانے پر زور دیا۔

آخر میں، انہوں نے مطالبہ کیا کہ سرحدوں پر ایک منصفانہ، مربوط اور انسان دوست حکمت عملی اپنائی جائے تاکہ وہ “نظرانداز کیے جانے کی جگہیں” نہ رہیں بلکہ “انسانی وقار کے ذمہ دارانہ تحفظ کے مراکز” بن سکیں۔

About The Author