سڑکوں،پارکوں میں سونے والے بےگھر افراد میں اضافہ: بارسلونا کے ساحلی علاقوں میں خیموں کی تعداد بھی بڑھ گئی

بارسلونا میں بے گھر افراد کی مدد کرنے والی تنظیموں نے خبردار کیا ہے کہ شہر میں بے گھری میں مسلسل اضافہ ہو رہا ہے اور اب زیادہ لوگ چھوٹے چھوٹے گروہوں کی صورت میں خیمے لگا کر رہنے کو ترجیح دے رہے ہیں۔

یورپی یونین نے بھی خبردار کیا ہے کہ سستی رہائش کی کمی اور بے گھری کے خلاف غیر مؤثر اقدامات کی وجہ سے بنیادی حقوق میں کمی آ رہی ہے۔

بارسلونا کے ساحلی علاقوں میں، سمندر کے بالکل قریب، خیموں میں رہنے والے بے گھر افراد کی بستیاں تیزی سے بڑھ رہی ہیں۔ یہ صورتحال رہائش کے بحران کے باعث پیدا ہوئی ہے۔ ایک خاتون سنڈی کہتی ہیں: “400 یورو میں ایک کمرہ لینے کے بجائے ہم یہاں سات افراد پورا ہفتہ کھا سکتے ہیں۔”

41 سالہ سنڈی، جو فلپائن سے تعلق رکھتی ہیں، پہلے ویٹریس کے طور پر 18 سال کام کرتی رہیں، لیکن ملازمت ختم ہونے کے بعد وہ کرایہ ادا نہ کر سکیں۔ ان کے تین بچے فلپائن میں رہتے ہیں اور وہ اپنی موجودہ حالت سے لاعلم ہیں۔ سنڈی قریبی شاپنگ سینٹر کے باتھ روم استعمال کر کے اپنی صفائی کا خیال رکھتی ہیں۔

اسی جگہ ایک اور شخص بھی رہتا ہے جو ویٹر کی نوکری کرتا ہے مگر زیادہ کرایہ اور تین ماہ کی ایڈوانس رقم کی شرط کی وجہ سے رہائش حاصل نہیں کر پا رہا۔ سنڈی کہتی ہیں: “ہم برے لوگ نہیں ہیں۔”

شہر کے دیگر ساحلی علاقوں، جیسے روندا لیتورال کے قریب، بھی خیمے نظر آتے ہیں، جبکہ کچھ افراد اکیلے چھوٹے خیموں میں رہ رہے ہیں۔ کچھ لوگ ان علاقوں میں اس وقت منتقل ہوئے جب پہلے کے بڑے کیمپ ختم کر دیے گئے۔

گرمیوں کی آمد کے ساتھ یہ مسئلہ مزید نمایاں ہو گیا ہے، جہاں یہ افراد ساحل پر آنے والے سیاحوں اور مقامی لوگوں کے ساتھ جگہ بانٹنے پر مجبور ہیں۔

فلاحی تنظیموں کے مطابق بے گھری میں اضافہ ہو رہا ہے اور لوگ شہر کے مرکزی علاقوں سے مضافاتی علاقوں کی طرف منتقل ہو رہے ہیں۔ ایک حالیہ سروے کے مطابق تقریباً 2,100 افراد بارسلونا میں سڑکوں پر سوتے ہیں، جو پہلے کے مقابلے میں 43 فیصد زیادہ ہیں۔

اگر ان افراد کو بھی شامل کیا جائے جو عارضی رہائش یا پناہ گاہوں میں رہتے ہیں تو بارسلونا میں بے گھر افراد کی مجموعی تعداد تقریباً 5,000 تک پہنچ جاتی ہے۔

About The Author