آئی جی سندھ نے ڈی ایس پی احمد کریم جیلانی کو معطل کردیا
انسپکٹر جنرل (آئی جی) سندھ پولیس نے ڈپٹی سپرنٹنڈنٹ آف پولیس (ڈی ایس پی) سے بھاری مقدار میں گٹکا برآمدگی کے معاملے کا نوٹس لے لیا۔
ترجمان سندھ پولیس کے مطابق آئی جی سندھ نے ڈی ایس پی احمد کریم جیلانی کو معطل کردیا ہے اور ڈپٹی انسپکٹر جنرل (ڈی آئی جی) تنویر عالم اوڈھو کو انکوائری افسر مقرر کے 15 دن میں رپورٹ طلب کی ہے۔
ترجمان سندھ پولیس کے مطابق ڈی ایس پی احمد کریم جیلانی کو چارج شیٹ بھی جاری کردی گئی۔
چارج شیٹ میں کہا گیا ہے کہ10مارچ کو کسٹمز نے جامشورو میں ڈی ایس پی سے ممنوعہ گٹکا برآمد کیا تھا، ڈی ایس پی پر الزام ہے کہ غیرقانونی گٹکے کی ترسیل کر رہے تھے۔
