بارسلونا: رامبلا دیل راوال اور پلازا ریئل میں 30 سے زائد نئی سیکیورٹی کیمرے نصب کرنے کا فیصلہ

بارسلونا کی بلدیہ نے عوامی سیکیورٹی کو بہتر بنانے کے لیے ایک اہم قدم اٹھاتے ہوئے شہر کے مرکزی علاقوں میں جدید ٹیکنالوجی اور عدالتی تعاون کو یکجا کرنے کا منصوبہ شروع کر دیا ہے۔

میئر جاؤمے کولبونی نے اعلان کیا ہے کہ ویڈیو نگرانی کے نظام کو وسیع کیا جائے گا، خاص طور پر ان مقامات پر جہاں لوگوں کا زیادہ ہجوم ہوتا ہے۔ اس منصوبے کے تحت جولائی کے دوران رامبلا دیل راوال میں 13 نئے کیمرے نصب کیے جائیں گے، جو سال کے آخر تک مکمل طور پر فعال ہو جائیں گے۔

اسی طرح، تاریخی پلازا ریئل میں 20 کیمرے لگائے جائیں گے، جو نہ صرف مرکزی چوک بلکہ اس کے اطراف کے برآمدوں کی بھی نگرانی کریں گے۔

گرمیوں کے سیزن کے پیش نظر مزید اقدامات بھی کیے جا رہے ہیں۔ سانت جوان کے موقع پر فرنٹ میریتیم (ساحلی علاقے) میں 12 کیمرے پہلے ہی فعال کیے جا چکے ہیں، تاہم ان کا رخ ساحل کی ریت کی طرف نہیں ہوگا تاکہ لوگوں کی پرائیویسی برقرار رہے۔

اس کے علاوہ، ایونیدا دے لا کاتیدرال پر 6 مزید کیمرے نصب کیے جا رہے ہیں جو اکتوبر میں فعال ہوں گے۔ لا رامبلا کی تزئین و آرائش کے منصوبے کے ساتھ وہاں کیمروں کی تعداد 32 سے بڑھا کر 62 کر دی جائے گی۔

شہر میں اس وقت تقریباً 160 سیکیورٹی کیمرے موجود ہیں، لیکن حکومت کا ہدف ہے کہ آئندہ چند سالوں میں ان کی تعداد بڑھا کر 1000 تک پہنچائی جائے، جن میں سے کم از کم 500 کیمرے 2027 تک فعال کرنے کا منصوبہ ہے۔

میئر کولبونی کے مطابق یہ کیمرے دوہرا کردار ادا کریں گے: ایک طرف یہ جرائم کی روک تھام میں مددگار ہوں گے اور دوسری طرف عدالتی کارروائی میں ثبوت کے طور پر استعمال ہوں گے، جس سے متاثرین کو تحفظ ملے گا۔

دوسری جانب، گواردیا اربانا کی جانب سے پراسیکیوشن کے ساتھ قائم کردہ خصوصی دفتر (OAF) بھی کام کر رہا ہے، جس کا مقصد پولیس اور عدالتوں کے درمیان رابطہ بہتر بنانا اور جرائم، خاص طور پر بار بار جرم کرنے والوں کے خلاف فوری کارروائی ممکن بنانا ہے۔

یہ یونٹ چار ماہ میں 62 کیسز سنبھال چکا ہے، جن میں سے 51 کامیابی سے حل ہو چکے ہیں۔ اس کا کام متاثرین کی مدد، ملزمان کی نشاندہی اور عدالتی عمل کو تیز کرنا ہے، خاص طور پر خواتین کے خلاف تشدد جیسے حساس معاملات میں۔

بلدیہ کے مطابق ان اقدامات کے نتیجے میں گزشتہ ایک سال میں بار بار جرم کرنے والوں سے متعلق جرائم میں تقریباً 8.5 فیصد کمی آئی ہے۔

میئر کا کہنا ہے کہ اس حکمت عملی کا مقصد جرائم میں کمی لانا، سزا کے عمل کو مؤثر بنانا اور شہریوں، خاص طور پر کمزور طبقات، کو بہتر تحفظ فراہم کرنا ہے۔

About The Author