- سویڈن کے مرکزی قصبے فائگرسٹا کے ایک سکول میں تلوار سے لیس 18 سالہ حملہ آور نے طلبہ پر حملہ کر کے 17 سالہ لڑکی کو ہلاک جبکہ تین دیگر افراد کو زخمی کر دیا ہے۔
پولیس کے مطابق دوپہر کو برنیل ہائی سکول میں تدریسی عمل کے دوران یہ واقعہ پیش آیا جہاں زخمی ہونے والے دو لڑکوں کی عمریں 12 اور 17 سال ہیں جنہیں معمولی چوٹیں آئیں۔
برطانوی اخبار دی گارڈین کے مطابق مقامی پولیس نے کارروائی کرتے ہوئے 18 سالہ ملزم کو موقع پر ہی گرفتار کر لیا، ابتدائی تحقیقات میں اس بات کی تفتیش کی جا رہی ہے کہ آیا ملزم سکولوں میں تشدد کو فروغ دینے والے کسی آن لائن گروہ یا برادری سے منسلک تھا۔پولیس ذرائع کے مطابق واقعہ سے ٹھیک 20 منٹ قبل ٹک ٹاک پر سکول کے بیت الخلا سے تلوار کی تصویر پوسٹ کی گئی تھی جس کے بارے میں شک ہے کہ یہ اسی حملہ آور کا اکاؤنٹ تھا۔
حملے سے قبل اس اکاؤنٹ سے کچھ ویڈیوز بھی شیئر کی گئی تھیں جن میں سویڈن میں ماضی میں ہونے والے پرتشدد واقعات اور ناروے میں 77 افراد کے قاتل اینڈرس برائیوک کا حوالہ شامل تھا۔
پولیس کا کہنا ہے کہ تفتیش کار ان آن لائن فورمز کا جائزہ لے رہے ہیں جنہوں نے ملزم کو اس کارروائی پر اکسایا ہو سکتا ہے۔
سویڈن کے وزیراعظم الف کرسٹرسن اور اپوزیشن لیڈر میگڈالینا اینڈرسن نے متاثرہ شہر کا دورہ کیا اور غمزدہ خاندانوں سے تعزیت کی، سویڈن میں 13 ستمبر کو ہونے والے عام انتخابات کی انتخابی مہم کے لیے تمام سیاسی رہنماؤں نے اپنے طے شدہ خطاب منسوخ کر دیے ہیں۔
