پاؤ کاسالس سے میری کیوری تک: کاتالونیا کی سڑکوں پر کن تاریخی شخصیات کے نام سب سے زیادہ ہیں

کاتالونیا میں سڑکوں، چوراہوں اور شاہراہوں کے نام تاریخی شخصیات کے نام پر رکھنا ایک عام روایت ہے۔ خطے میں موجود ایک لاکھ چھ ہزار سے زائد سڑکوں اور عوامی مقامات میں سے بڑی تعداد ایسے افراد کے نام سے منسوب ہے جنہوں نے تاریخ، ثقافت اور سماج پر گہرا اثر چھوڑا۔

کاتالونیا کے کارٹوگرافک اور جیولوجیکل انسٹیٹیوٹ (ICGC) کے اعداد و شمار، جن کا تجزیہ Catalan News نے کیا، کے مطابق سب سے زیادہ سراہا جانے والا نام مشہور سیلست اور موسیقار پاؤ کاسالس کا ہے، جن کے نام پر پورے کاتالونیا میں 400 سے زائد سڑکیں موجود ہیں۔ ان کے بعد عظیم ادیب جسنت ورداگیر آتے ہیں، جن کا نام بھی تقریباً 400 سڑکوں پر رکھا گیا ہے۔

دیگر نمایاں مرد شخصیات میں سابق کاتالان صدر لوئیس کومپانیز شامل ہیں، جن کے نام پر 286 سڑکیں ہیں، جبکہ پومپیو فابرا، جوان ماراگال، انتونی گاؤدی اور آنخیل گیومرا جیسے نام بھی نمایاں ہیں۔

خواتین کی نمائندگی محدود

خواتین کے معاملے میں تصویر خاصی مختلف ہے۔ سب سے زیادہ سڑکیں جن خاتون کے نام پر ہیں وہ معروف ادیبہ مرسے رودوریدا ہیں، جن کے نام پر 138 سڑکیں موجود ہیں، جو سرِفہرست مرد شخصیات کے مقابلے میں کہیں کم ہیں۔

ان کے بعد ادیبہ مونتسیرات روئگ اور ماریا اوریلیا کامپانی آتی ہیں، جن کے نام بالترتیب سو سے کچھ زائد اور 78 سڑکوں پر رکھے گئے ہیں۔

ماہرِ تعلیم روزا سینسات اور انارکسٹ رہنما فریدریکا مونتسینی کے نام بھی فہرست میں شامل ہیں، تاہم دونوں کے حصے میں تقریباً 50 سڑکیں آتی ہیں۔

مردوں کے نام غالب

اعداد و شمار کے مطابق کاتالونیا میں سڑکوں کے 500 سب سے عام ناموں میں سے تقریباً 83 فیصد مرد تاریخی شخصیات یا مرد اولیا کے نام پر ہیں۔

ان میں 72 مرد شخصیات اور 37 مرد اولیا شامل ہیں، جبکہ صرف 14 خواتین اولیا اور محض 9 نمایاں خواتین کے نام اس فہرست میں جگہ بنا سکے ہیں۔

مجموعی طور پر دیکھا جائے تو 10 ہزار سے زائد سڑکیں مردوں یا مرد اولیا کے نام سے منسوب ہیں، جبکہ خواتین یا خواتین اولیا کے نام پر صرف لگ بھگ 1,500 سڑکیں ہیں۔

ICGC کے شعبۂ ٹوپونیمی کے سربراہ میکل پریلا کے مطابق یہ عدم توازن تاریخی ناانصافیوں کی عکاسی کرتا ہے۔

ان کا کہنا ہے کہ ماضی میں سائنس، ادب، بادشاہت اور فوج جیسے شعبے زیادہ تر مردوں کے ہاتھ میں رہے، اسی لیے سڑکوں کے نام بھی زیادہ تر مردوں کے نام پر رکھے گئے۔

البتہ ان کے مطابق حالیہ برسوں میں بلدیاتی ادارے اس فرق کے بارے میں زیادہ باشعور ہو گئے ہیں اور خواتین کو خراجِ تحسین پیش کرنے یا کم اہمیت والے پرانے نام تبدیل کرنے کی کوششیں شروع ہو چکی ہیں۔

پریلا کا کہنا ہے کہ رجحان بدل رہا ہے، مگر فرق اب بھی بہت زیادہ ہے، کیونکہ سڑکوں کے نام دراصل اس معاشرے کا آئینہ ہوتے ہیں جو انہیں منتخب کرتا ہے۔

عالمی شخصیات بھی نمایاں

اگرچہ مقامی شخصیات کا غلبہ ہے، تاہم کئی سڑکیں عالمی شہرت یافتہ شخصیات کے نام پر بھی ہیں۔

ان میں سب سے نمایاں نام ڈاکٹر الیگزینڈر فلیمنگ کا ہے، جن کے نام پر 151 سڑکیں ہیں۔

ان کے بعد کرسٹوفر کولمبس (85 سڑکیں) اور مشہور سائنس دان میری کیوری کا نمبر آتا ہے۔

موسیقاروں میں بیتھوون سب سے زیادہ نظر آتے ہیں، اس کے بعد موزارٹ اور ویگنر ہیں۔

سیاسی شخصیات میں سابق چلی کے صدر سلوادور آیندے کے نام پر 16 سڑکیں ہیں۔ اس کے علاوہ مائیکل اینجلو، لیونارڈو ڈاونچی، گیلیلیو گیلیلی،پاکستان سے محترمہ بینظیر بھٹو شہید اور کوپرنیکس جیسے عالمی نام بھی کاتالونیا کی سڑکوں پر دیکھے جا سکتے ہیں۔