آسٹریلیا میں کام کرنے والا ہسپانوی کسان ماریو بتاتا ہے کہ وہ کتنا کماتا ہے؟
Screenshot
بارسلونا(دوست نیوز)حالیہ برسوں میں اسپین کے کئی نوجوان بہتر روزگار اور مالی استحکام کی تلاش میں ملک چھوڑ کر بیرونِ ملک جا رہے ہیں۔ ان مقبول مقامات میں آسٹریلیا سرفہرست ہے، جہاں ملازمت کے مواقع نسبتاً آسانی سے مل جاتے ہیں اور قلیل مدت میں بچت ممکن ہو جاتی ہے۔
ماریو بھی انہی نوجوانوں میں شامل ہے۔ وہ گزشتہ پانچ برس سے آسٹریلیا میں مقیم ہے اور زرعی شعبے سے وابستہ ہے۔ اپنی ٹک ٹاک ویڈیو میں ماریو بتاتا ہے کہ اس وقت وہ کپاس کے ایک بڑے فارم پر کام کر رہا ہے۔
ویڈیو میں وہ کہتا ہے کہ وہ پیر سے اتوار تک روزانہ بارہ گھنٹے کام کرتا ہے۔ اس کے مطابق سب سے بڑی مشکل جسمانی نہیں بلکہ ذہنی طور پر اتنے طویل اوقاتِ کار کو برداشت کرنا ہے۔ تاہم اس کا کہنا ہے کہ یہ کام زیادہ مشقت طلب نہیں کیونکہ اس میں بھاری جسمانی محنت شامل نہیں۔
ماریو کی ذمہ داریوں میں لوڈر نامی زرعی ٹریکٹر کے ذریعے ٹرکوں سے کپاس کے تھیلے اتارنا اور انہیں ایک گودام تک پہنچانا شامل ہے، جہاں بعد میں انہیں مختلف کنٹینرز میں تقسیم کیا جاتا ہے۔
ماریو کے مطابق اسے عام اوقات میں فی گھنٹہ 31 آسٹریلین ڈالر دیے جاتے ہیں، جو تقریباً 18 یورو بنتے ہیں، جبکہ اوور ٹائم کے لیے 56 آسٹریلین ڈالر فی گھنٹہ ملتے ہیں، جو لگ بھگ 32 یورو کے برابر ہیں۔
زیادہ اوور ٹائم کی بدولت وہ ہفتے میں اوسطاً 2,950 آسٹریلین ڈالر کماتا ہے، جو ٹیکس کی کٹوتی کے بعد تقریباً 1,700 یورو بنتے ہیں۔
ایک اور ویڈیو میں ماریو نے اپنے بنیادی اخراجات کا بھی ذکر کیا ہے۔ اس کے مطابق وہ ہفتہ وار 140 آسٹریلین ڈالر کرایہ ادا کرتا ہے، جو تقریباً 81 یورو کے برابر ہے۔ اس حوالے سے وہ کہتا ہے کہ “چار گھنٹے کی مزدوری سے پورے ہفتے کا کرایہ نکل آتا ہے۔”
خوراک پر اس کے ہفتہ وار اخراجات تقریباً 90 آسٹریلین ڈالر جبکہ ایندھن پر 20 ڈالر آتے ہیں۔ یوں مجموعی طور پر اس کے بنیادی اخراجات تین گھنٹے کی کمائی میں پورے ہو جاتے ہیں، جس کے باعث وہ اپنی آمدن کا بڑا حصہ بچانے کے قابل ہو جاتا ہے۔
About The Author
