کاتالونیا کو یونیسکو اور عالمی سیاحتی تنظیم میں نشست مل گئی

بارسلونا(دوست نیوز) ہسپانوی حکومت نے کاتالان جماعت جونتس کے ساتھ کیے گئے معاہدے کے تحت دو اہم وعدے پورے کر دیے ہیں، جن کے نتیجے میں کاتالونیا کو یونیسکو اور عالمی سیاحتی تنظیم (World Tourism Organization) میں نشست ملنے کا راستہ ہموار ہو گیا ہے۔

یہ پیش رفت پیر کے روز اس وقت سامنے آئی جب اسپین کے وزیرِ خارجہ خوسے مانوئل الباریس اور کاتالونیا کے وزیر برائے یورپی یونین و خارجی امور جاومے دک نے میڈرڈ میں ایک معاہدے پر دستخط کیے۔ اس معاہدے میں دو الگ الگ سمجھوتے شامل ہیں، جو اسپین کی حکومت اور کاتالان آزادی پسند جماعت جونتس کے درمیان ہونے والے سرمایۂ اقتدار (Investiture Pact) کا حصہ تھے۔

جاومے دُک کے مطابق، ان معاہدوں کے بعد آنے والے مہینوں میں کاتالونیا کے لیے دونوں عالمی اداروں میں بطور “ایسوسی ایٹ ممبر” شمولیت کی راہ کھل گئی ہے۔ ان کا کہنا تھا کہ یہ قدم کاتالونیا کی عالمی سطح پر موجودگی اور شناخت کے لیے نہایت اہم ہے۔

معاہدوں کا مقصد کاتالونیا کو ان شعبوں میں زیادہ مؤثر کردار دینا بھی ہے جو علاقائی حکومت کے دائرۂ اختیار میں آتے ہیں، خصوصاً ثقافت، تعلیم اور سیاحت جیسے اہم میدان۔