ہسپانوی وزیراعظم پیدروسانچز کی اہلیہ بیگونیا گومیز نے جج پینادو کے حکم پر اپنا پاسپورٹ جمع کرا دیا
Screenshot
ہسپانوی وزیراعظم پیدروسانچز کی اہلیہ نے بدھ 24 جون کو شام 6 بجے میڈرڈ کے پلازا دے کاستیّا کی عدالت میں اپنا پاسپورٹ جمع کرا دیا۔ یہ اقدام جج خوان کارلوس پینادو کے اس حکم کے بعد کیا گیا جس میں ان کے خلاف مقدمے کی سماعت شروع کرنے کے ساتھ چند احتیاطی پابندیاں عائد کی گئی تھیں۔
ان پابندیوں میں پاسپورٹ کی ضبطی، ملک سے باہر جانے پر پابندی اور ہر پندرہ دن بعد عدالت میں حاضری لگا کر دستخط کرنا شامل ہے۔
اس سے ایک روز قبل ان کی سابق مشیر کرستینا الواریز بھی اپنا پاسپورٹ جمع کرا چکی تھیں۔ گومیز عدالت میں زیرِ زمین گیراج کے ذریعے داخل ہوئیں، جس کی اجازت میڈرڈ کی سینئر جج ماریا جیسس دل بارکو نے دی تھی۔
دوسری جانب گومیز کے وکیل انتونیو کاماچو نے ان اقدامات کے خلاف میڈرڈ کی صوبائی عدالت میں اپیل دائر کی ہے۔ ان کا مؤقف ہے کہ یہ پابندیاں غیر مناسب ہیں اور بنیادی حق، یعنی آزادانہ نقل و حرکت، کے خلاف ہیں۔ وکیل نے یہ بھی کہا کہ گومیز کے فرار ہونے کا کوئی خطرہ نہیں کیونکہ وہ مسلسل ریاستی سکیورٹی کے حصار میں رہتی ہیں۔
دفاعی ٹیم کے مطابق گومیز ہر عدالتی طلبی پر پیش ہوئی ہیں اور ان کے خاندانی و پیشہ ورانہ تعلقات اسپین میں مضبوط ہیں۔
تاہم جج پینادو نے اپنے فیصلے میں کہا کہ فرار کا امکان موجود ہے اور یہ بھی دعویٰ کیا کہ سکیورٹی اہلکار کسی مرحلے پر فرار میں مدد کر سکتے ہیں، خاص طور پر اس صورت میں جب مستقبل میں وزیرِ اعظم کا عہدہ ختم ہو جائے اور سکیورٹی ختم ہو جائے۔
اسی بیان پر تنازع کھڑا ہو گیا، جس کے بعد جوڈیشل کونسل نے جج پینادو کے خلاف ممکنہ تادیبی کارروائی کے لیے راستہ کھول دیا ہے۔ یہ اقدام اس بنیاد پر کیا جا رہا ہے کہ آیا جج نے پولیس کے بارے میں نامناسب یا توہین آمیز ریمارکس دیے ہیں یا نہیں۔
About The Author
