ہمیں ابھی ایک حقیقی یورپی فوج بنانی چاہیے، دس سال بعد نہیں۔پیدروسانچز کا میونخ سیکورٹی کانفرنس میں خطاب

ہسپانوی وزیر اعظم Pedro Sánchez نے میونخ سکیورٹی کانفرنس میں Munich Security Conference کے دوران فرانس اور جرمنی کے درمیان جاری جوہری دفاعی بحث سے خود کو الگ کرتے ہوئے کہا کہ “جوہری اسلحے میں اضافہ درست راستہ نہیں ہے”۔

انہوں نے یہ بھی واضح کیا کہ اسپین دفاعی اخراجات کو جی ڈی پی کے 5 فیصد تک نہیں بڑھائے گا، کیونکہ اس سے یورپ کو امریکا پر زیادہ انحصار کرنا پڑے گا۔ اس کے بجائے انہوں نے ایک “حقیقی یورپی فوج” بنانے کی ضرورت پر زور دیا۔

یہ بیان اس وقت سامنے آیا جب Germany اور France یورپ کے لیے فرانسیسی جوہری دفاعی نظام کو وسعت دینے پر غور کر رہے ہیں۔ سانچیز نے اس حکمت عملی کو خطرناک قرار دیتے ہوئے کہا:

“جو نظام مکمل تباہی سے بچنے کے لیے صفر غلطی کا تقاضا کرتا ہے، وہ ضمانت نہیں بلکہ ایک خطرناک جوا ہے۔ جوہری دفاع بہت زیادہ خطرناک ہے۔”

انہوں نے زور دے کر کہا کہ یورپ کو اپنی سکیورٹی جوہری ہتھیاروں کے بجائے روایتی فوجی تعاون اور اسلحہ کنٹرول کے ذریعے مضبوط بنانا چاہیے۔

سانچیز نے کہا:“ہمیں ابھی ایک حقیقی یورپی فوج بنانی چاہیے، دس سال بعد نہیں۔ اسپین اس مقصد کے لیے تمام ضروری وسائل فراہم کرے گا۔”

ان کا کہنا تھا کہ اصل توجہ صرف دفاع پر خرچ بڑھانے پر نہیں بلکہ یورپی ممالک کے مشترکہ اور مؤثر دفاعی اخراجات پر ہونی چاہیے تاکہ امریکا پر انحصار کم ہو۔

سانچیز نے عالمی طاقتوں پر زور دیا کہ وہ نیا START معاہدہ کریں تاکہ جوہری اسلحے کی دوڑ کو روکا جا سکے۔ انہوں نے کہا:“ہمیں جوہری اسلحے کی دوڑ روکنی ہوگی، مذاکرات کرنے ہوں گے اور نیا معاہدہ کرنا ہوگا۔ ہمیں طاقت کا مظاہرہ کرنے کے بجائے ذمہ داری دکھانی چاہیے۔”

جوہری ہتھیاروں کی مخالفت کے باوجود، سانچیز نے واضح کیا کہ یورپ کو روسی صدر Vladimir Putin کے خطرے کا مقابلہ کرنے کے لیے اپنی دفاعی صلاحیتیں مضبوط کرنا ہوں گی۔ ان کے مطابق، یورپ کو اپنی دفاعی طاقت خود بنانی چاہیے۔

About The Author