اسپین: ریگولرائزیشن کی درخواست دینے والے مہاجرین 15 کام کے دنوں میں کام شروع کر سکیں گے

میڈرڈ/  اسپین میں غیر قانونی طور پر مقیم غیر ملکیوں کے لیے متوقع غیر معمولی ریگولرائزیشن پروگرام کے تحت درخواست دینے والے مہاجرین کو صرف 15 کام کے دنوں کے اندر کام کرنے اور رہائش کی اجازت مل سکے گی۔

یہ بات اسپین کی سیکریٹری آف اسٹیٹ برائے مہاجرت Pilar Cancela نے ہسپانوی ریڈیو کے پروگرام میں انٹرویو دیتے ہوئے کہی، جو Radio Nacional de España پر نشر ہوا۔

پیلار کانسیلا نے کہا کہ حکومت اس عمل کو تیز، آسان اور کم بیوروکریٹک بنانے کے لیے پرعزم ہے تاکہ درخواست دہندگان کو غیر ضروری مشکلات کا سامنا نہ کرنا پڑے۔ انہوں نے کہا کہ انتظامیہ کا مقصد “مسائل پیدا کرنا نہیں بلکہ حل فراہم کرنا” ہے۔

انہوں نے وضاحت کی کہ درخواستیں دو طریقوں سے جمع کرائی جا سکیں گی:

• مجاز دفاتر میں ذاتی طور پر
• یا آن لائن پلیٹ فارم “Mercurio” کے ذریعے، جو پہلے ہی امیگریشن کے معاملات میں استعمال ہو رہا ہے

ان کے مطابق درخواست جمع ہونے کے بعد اسے باقاعدہ کارروائی میں شامل کرنے میں 15 کام کے دنوں سے زیادہ وقت نہیں لگے گا۔

درخواست منظورِ کارروائی ہوتے ہی درخواست دہندہ کو اسپین میں فوری طور پر کام کرنے اور رہائش اختیار کرنے کی اجازت مل جائے گی، اگرچہ حتمی فیصلے تک کچھ وقت لگ سکتا ہے۔

پیلار کانسیلا نے مزید کہا کہ یہ عمل پیچیدہ نہیں ہوگا اور حکومت درخواست دہندگان سے وہ معلومات دوبارہ طلب نہیں کرے گی جو پہلے سے سرکاری ریکارڈ میں موجود ہیں، جیسا کہ انتظامی طریقہ کار کے قانون میں بھی درج ہے۔

یہ اقدام اسپین میں مقیم ہزاروں غیر قانونی مہاجرین کے لیے قانونی حیثیت حاصل کرنے اور روزگار کے مواقع تک رسائی کا اہم ذریعہ بن سکتا ہے۔

About The Author