اسپین کے وزیرِاعظم پیدروسانچزنے اسرائیل کے سزائے موت کے قانون کو “نسلی امتیاز کی جانب ایک قدم” قرار دے دیا

میڈرڈ: اسپین کے وزیرِاعظم پیدرو سانچیز نے پیر کے روز اسرائیلی پارلیمنٹ کی جانب سے منظور کیے گئے اس قانون کی شدید مذمت کی ہے، جس کے تحت فوجی عدالتوں کی طرف سے مہلک حملوں کے مرتکب فلسطینیوں کو سزائے موت دی جائے گی۔

سانچیز نے منگل کو سوشل میڈیا پلیٹ فارم X پر لکھا“یہ ایک غیر متوازن اقدام ہے، جو ان اسرائیلیوں پر لاگو نہیں ہوگا جو یہی جرائم کریں۔ ایک ہی جرم، مگر مختلف سزا۔ یہ اپارتھائیڈ کی جانب ایک اور قدم ہے۔ دنیا خاموش نہیں رہ سکتی۔”

واضح رہے کہ سانچیز مغربی رہنماؤں میں فلسطینیوں کے سب سے زیادہ کھل کر حامی سمجھے جاتے ہیں۔

اپارتھائیڈ کیا ہے؟

اپارتھائیڈ جنوبی افریقہ میں گزشتہ صدی کے دوسرے نصف میں سفید فام اقلیت کی حکومت کی طرف سے نافذ کیا گیا نسلی امتیاز کا نظام تھا۔

اسپین اور اسرائیل کے تعلقات 2023 سے 2025 کے درمیان غزہ جنگ کے دوران شدید کشیدہ ہو گئے تھے، جب میڈرڈ نے اسرائیلی کارروائیوں کو “نسل کشی” قرار دیا تھا۔ اسرائیلی حکام نے اس مؤقف کو کئی بار “یہود دشمنی” کہا۔

حالیہ مہینے میں کشیدگی مزید بڑھ گئی جب اسپین نے امریکہ اور اسرائیل کے ایران پر حملوں کی مخالفت کی، جس کے بعد 11 مارچ کو میڈرڈ نے اسرائیل سے اپنا سفیر مستقل طور پر واپس بلا لیا۔

پیر کو منظور کیے گئے اس قانون کے تحت فوجی عدالتوں میں مہلک حملوں کے مرتکب فلسطینیوں کے لیے پھانسی کو بنیادی سزا قرار دیا گیا ہے۔ یہ اقدام وزیرِاعظم نیتن یاہو کے انتہائی دائیں بازو کے اتحادیوں کے وعدے کی تکمیل ہے۔

نقادوں کا کہنا ہے کہ اس قانون کی زبان عملی طور پر سزائے موت کو زیادہ تر اسرائیل کی 20 فیصد عرب اقلیت تک محدود کر دیتی ہے، جن میں سے بہت سے خود کو فلسطینی شناخت سے وابستہ کرتے ہیں، جبکہ یہودی شہری اس کے دائرے سے باہر رہتے ہیں۔

یورپی کمیشن نے بھی اس قانون پر تشویش کا اظہار کرتے ہوئے اسے جمہوری اصولوں کے حوالے سے “واضح پسپائی” قرار دیا ہے۔

یاد رہے کہ اسرائیل نے 1954 میں قتل کے جرم پر سزائے موت ختم کر دی تھی۔ بعد ازاں صرف ایک شخص، Adolf Eichmann کو 1962 میں سویلین عدالت کے فیصلے کے بعد پھانسی دی گئی، جو نازی ہولوکاسٹ کے منصوبہ سازوں میں شامل تھا۔