بارسلونا، جھگڑے کے دوران ایک شخص چاقو کےطوار سے زخمی، پولیس نے 13 افراد کو گرفتار کر لیا

اتوار کے روز بارسلونا کے میٹرو میں دو گروہوں کے درمیان ہونے والے جھگڑے کے بعد ایک شخص چاقو کے وار سے زخمی ہو گیا جبکہ 13 افراد کو حراست میں لے لیا گیا۔ یہ واقعہ ایل کول-لا تیخونیر(‘El Coll – La Teixonera)اسٹیشن کے پلیٹ فارم پر پیش آیا۔ زخمی شخص کو موقع پر ہی ابتدائی طبی امداد دی گئی، جس کے بعد اسے اسپتال منتقل کر دیا گیا۔

جمعہ اور ہفتہ کی درمیانی رات تقریباً بارہ بجے، ٹرانسپورٹ سیکیورٹی عملے نے پولیس (موسوس) کو واقعے کی اطلاع دی، جس کے بعد پولیس کی متعدد گاڑیاں ایل کول-لا تیخونیرا اور وال دے ایبرون اسٹیشنز پر تعینات کی گئیں۔

پولیس جب پہلے اسٹیشن پر پہنچی تو میٹرو سیکیورٹی عملہ پہلے ہی سات افراد کو روک چکا تھا۔ ایک اور گروہ وہاں سے فرار ہو گیا تھا، تاہم کچھ دیر بعد پولیس نے انہیں وال دے ایبرون اسٹیشن پر گرفتار کر لیا۔ سیکیورٹی کیمروں کی مدد سے پولیس نے 13 افراد کی شناخت کی اور بالآخر سب کو گرفتار کر لیا۔

گرفتار افراد پر زخمی کرنے اور ہنگامہ آرائی کے الزامات عائد کیے گئے ہیں۔ ان کے قبضے سے کٹر اور چاقو بھی برآمد ہوئے ہیں۔ گرفتار شدگان میں چھ بالغ اور سات کم عمر افراد شامل ہیں۔

زخمی شخص کو اسپتال سے فارغ کیے جانے کے بعد اسے بھی عدالت میں پیش کیا جائے گا۔