غیر قانونی امیگریشن مافیا اسپین داخلے کے لیے 10 ہزار یورو، جعلی کرایہ نامہ اور رہائشی رجسٹریشن سرٹیفکیٹ فراہم کرنے لگے

غیر قانونی امیگریشن سے منسلک مافیا اسپین میں داخلے کے لیے تقریباً 10 ہزار یورو وصول کر رہے ہیں، جس کے ساتھ جعلی کرایہ کا معاہدہ اور رہائشی رجسٹریشن (پدرون) کا سرٹیفکیٹ بھی فراہم کیا جاتا ہے۔ یہ پیشکشیں سوشل میڈیا پلیٹ فارم فیس بک کے ان صفحات پر دیکھی گئی ہیں جنہیں ہزاروں لوگ فالو کرتے ہیں۔

سال 2025 میں اسپین میں 36,775 غیر قانونی داخلے ریکارڈ کیے گئے، جو 2024 کے مقابلے میں تقریباً نصف ہیں، کیونکہ 2024 میں یہ تعداد ریکارڈ سطح پر تھی۔ اس کمی کی بڑی وجہ کینری روٹ میں 80 فیصد کمی ہے۔ تاہم الجزائر کے راستے آنے والوں میں غیر معمولی اضافہ ہوا ہے، جو کل آمد کا 75 فیصد بنتا ہے، اور اس کے باعث بالیئرک جزائر میں غیر قانونی داخلوں میں 24.5 فیصد اضافہ ہوا۔

اب واضح طور پر رجحان تبدیل ہو چکا ہے اور الجزائر سے آنے والے نیٹ ورک زیادہ سرگرم ہو گئے ہیں۔ تحقیقاتی صحافی Rubén Pulido کے مطابق جلد ہی الجزائر سے کشتیوں کی بڑی تعداد اسپین کے مشرقی ساحل اور بالیئرک جزائر کی طرف روانہ ہو سکتی ہے۔

امیگرینٹس کو نہ صرف اسپین پہنچنے بلکہ یہاں قیام، رہائش اور بعد میں قانونی حیثیت حاصل کرنے کا موقع نظر آ رہا ہے۔ اسی وجہ سے “ایفیکتویامادا” (یعنی سہولتوں کی وجہ سے کشش) کی بات کی جا رہی ہے، کیونکہ اسپین کو یورپ کے دیگر ممالک کے مقابلے میں نسبتاً نرم پالیسیوں والا ملک سمجھا جا رہا ہے۔

رپورٹ کے مطابق انسانی اسمگلر تیز رفتار کشتیوں (فینٹم بوٹس) کے ذریعے لوگوں کو منتقل کرتے ہیں۔ اسپین پہنچنے کے بعد انہیں جعلی کرایہ نامہ اور رجسٹریشن سرٹیفکیٹ فراہم کیا جاتا ہے تاکہ وہ سرکاری کاغذی کارروائی اور سماجی سہولیات تک آسانی سے رسائی حاصل کر سکیں۔

اس معاملے کی تحقیقات اسپین کی نیشنل پولیس کا ادارہ برائے امیگریشن و بارڈر کنٹرول کر رہا ہے تاکہ ان نیٹ ورکس کو ختم کیا جا سکے۔ دوسری جانب حکومت کی طرف سے جاری بڑے پیمانے پر قانونی حیثیت دینے کے عمل پر بھی تنقید ہو رہی ہے کہ اس سے مزید لوگوں کو آنے کی ترغیب مل سکتی ہے۔

اعداد و شمار کے مطابق 2026 میں بحیرہ روم کے مغربی راستے سے آمد میں 21 فیصد اضافہ ہوا ہے۔ بالیئرک جزائر میں 1,318 افراد پہنچے جبکہ گزشتہ سال یہ تعداد 1,104 تھی۔ اسی طرح اسپین کے مین لینڈ میں 1,580 افراد آئے جو پچھلے سال 1,287 تھے۔

مزید یہ کہ صرف 5 فیصد غیر ملکی کارکن ایسے ہوتے ہیں جو پہلے سے ملازمت کے معاہدے کے ساتھ اسپین آتے ہیں۔ زیادہ تر افراد “ارائیگو” (یعنی کچھ عرصہ غیر قانونی طور پر رہنے کے بعد قانونی حیثیت حاصل کرنا) کے ذریعے لیبر مارکیٹ میں داخل ہوتے ہیں، جبکہ 25 فیصد پناہ کی درخواست کے ذریعے آتے ہیں۔

اس وقت اسپین میں 394,110 غیر ملکی ایسے ہیں جنہیں ارائیگو کے تحت رہائشی اجازت نامہ ملا ہوا ہے، جو ایک ریکارڈ سطح ہے۔ تاہم ان میں سے صرف 54 فیصد ہی سوشل سکیورٹی میں رجسٹرڈ ہیں، یعنی وہ باقاعدہ طور پر معیشت میں حصہ ڈال رہے ہیں۔

About The Author