سپریم کورٹ غیر ملکیوں کی ریگولرائزیشن کو روکنے کی درخواست مسترد کردے، اسٹیٹ اٹارنی
Screenshot
ریاست کے قانونی مشیروں (Abogacía del Estado) نے سپریم کورٹ سے درخواست کی ہے کہ وہ اپریل میں کابینہ کے ذریعے منظور کیے گئے غیر قانونی طور پر مقیم تارکین وطن کی خصوصی ریگولرائزیشن کو عارضی طور پر روکنے کی درخواست مسترد کر دے۔ ریاستی قانونی سروسز نے عدالت سے کہا ہے کہ وہ ان درخواستوں کو قبول نہ کرے جو تین تنظیموں، میڈرڈ کی خودمختار حکومت اور ووکس پارٹی کی جانب سے دائر کی گئی ہیں۔
یہ درخواستیں اس عمل کو روکنے کے لیے ہیں جس کے ذریعے حکومت تقریباً پانچ لاکھ ایسے غیر ملکیوں کو قانونی حیثیت دینا چاہتی ہے جو اسپین میں غیر قانونی طور پر مقیم ہیں، تاکہ وہ سسٹم میں شامل ہو سکیں، ٹیکس ادا کریں اور قانونی حقوق و فرائض حاصل کر سکیں۔
ریاستی وکلاء کے مطابق اس عمل کے لیے عارضی پابندی کی کوئی قانونی بنیاد موجود نہیں، کیونکہ اگر مستقبل میں عدالت اس فیصلے کو کالعدم بھی کر دے تو اس کے اثرات ناقابلِ واپسی نہیں ہوں گے۔ ان کے مطابق اس ریگولرائزیشن سے عوامی خدمات پر بھی کوئی منفی اثر نہیں پڑے گا، جیسا کہ درخواست گزاروں نے دعویٰ کیا ہے۔
سپریم کورٹ میں اس حوالے سے مختلف درخواستوں پر سماعت بدھ کے روز ہوگی، جہاں صرف عارضی طور پر روکنے کے معاملے پر غور کیا جائے گا، جبکہ اصل فیصلہ بعد میں کیا جائے گا۔
درخواست گزاروں کا مؤقف ہے کہ اگر یہ عمل شروع ہو گیا اور بعد میں عدالت نے اسے غیر قانونی قرار دیا تو اس کے اثرات واپس نہیں کیے جا سکیں گے، اور یہ صحت سمیت دیگر عوامی خدمات پر دباؤ ڈالے گا۔
لیکن ریاستی وکلاء کا کہنا ہے کہ یہ دعویٰ درست نہیں ہے، کیونکہ یہ افراد پہلے ہی اسپین میں موجود ہیں اور عوامی خدمات سے فائدہ اٹھا رہے ہیں۔ ان کے مطابق باقاعدہ قانونی حیثیت دینے سے ان کو مکمل حقوق ملیں گے اور وہ معیشت میں بھی حصہ ڈالیں گے، جس سے سوشل سیکیورٹی نظام میں مزید شراکت آئے گی۔
سپریم کورٹ پہلے ہی اپریل میں اس ریگولرائزیشن کو فوری طور پر روکنے کی درخواست مسترد کر چکی ہے اور معاملے کی باقاعدہ سماعت کا حکم دیا تھا۔
About The Author
