اسپین میں 2025 تک تقریباً 10 لاکھ گھروں کی کمی، جسے پورا کرنے میں 60 سال لگ سکتے ہیں: iAhorro رپورٹ
Screenshot
میڈرڈ/ ایک مالیاتی مشاورتی ادارے iAhorro کی رپورٹ کے مطابق اسپین میں 2025 تک گھروں کی مجموعی کمی تقریباً 9 لاکھ 83 ہزار تک پہنچ چکی ہے، اور موجودہ تعمیراتی رفتار برقرار رہی تو اس کمی کو پورا کرنے میں 60 سال لگ سکتے ہیں۔
رپورٹ کے مطابق، 2024 اور 2025 کے دوران ہر سال اوسطاً 1 لاکھ 43 ہزار 350 نئے گھر تعمیر کیے گئے، جو کہ 2007-2008 کے مقابلے میں 77.6 فیصد کم ہے۔ اس دور میں صرف دو سالوں میں 12 لاکھ 70 ہزار مکانات بنائے گئے تھے۔
iAhorro کی ترجمان لورا مارتینیز کے مطابق اگر 2008 جیسی تعمیراتی رفتار دوبارہ حاصل ہو جائے تو صرف 2 سے 3 سال میں طلب پوری ہو سکتی ہے۔ تاہم 2025 میں 1 لاکھ 59 ہزار 200 گھروں کی فراہمی، 2 لاکھ 3 ہزار 200 گھروں کی طلب کو پورا نہ کر سکی، جس سے اس سال 44 ہزار گھروں کی مزید کمی پیدا ہوئی۔
رپورٹ میں یہ بھی بتایا گیا ہے کہ 2026 سے 2030 تک کے سرکاری ہاؤسنگ منصوبے کے تحت کل 75 ہزار نئے مکانات تعمیر کیے جائیں گے، یعنی سالانہ تقریباً 15 ہزار۔ یہ مقدار مجموعی کمی کا صرف 1.5 فیصد ہی پورا کر پائے گی، جو کہ ناکافی ہے۔
علاقائی صورتحال کے لحاظ سے میڈرڈ میں حالات “انتہائی سنگین” قرار دیے گئے ہیں، جہاں خالی گھروں کی شرح صرف 6.4 فیصد ہے، جو تکنیکی طور پر مکمل استعمال (full occupancy) کے برابر سمجھی جاتی ہے۔ اس کا مطلب ہے کہ آبادی میں معمولی اضافہ بھی براہ راست قیمتوں پر دباؤ ڈالتا ہے۔
اس کے برعکس، “خالی پڑے علاقوں” (España vaciada) میں گھروں کی خالی شرح زیادہ ہے۔ گالیسیا میں یہ شرح 28.8 فیصد، کاسٹیا لا مانچا میں 22.6 فیصد، اور آستوریاس میں 21.5 فیصد ہے۔
لورا مارٹینیز کے مطابق یہ اعداد و شمار واضح کرتے ہیں کہ اسپین میں شدید عدم توازن موجود ہے: ایک طرف بڑے شہر جیسے میڈرڈ اور بارسلونا ہیں جہاں رہنے کی طلب بہت زیادہ ہے، اور دوسری طرف ایسے علاقے ہیں جہاں گھر تو موجود ہیں مگر رہنے والے نہیں۔
قانونی تحفظ کے حوالے سے، 2024 میں کاتالونیا میں غیر قانونی قبضوں کے 42.5 فیصد کیسز رپورٹ ہوئے، جو 2025 میں کم ہو کر 5,913 رہ گئے۔ ملک بھر میں ہر ایک لاکھ افراد پر ایسے کیسز کی شرح 2010 میں 5 سے بڑھ کر 2025 میں 30.4 ہو گئی ہے۔
کاتالونیا کے بعد، 2025 میں اندلس میں 1,909 کیسز (13.4 فیصد)، ویلنسیہ میں 1,805 کیسز (10.7 فیصد)، جبکہ میڈرڈ میں 1,269 کیسز (8.8 فیصد) رپورٹ ہوئے۔
About The Author
