کاتالونیا: نوجوانوں کے لیے کرائے پر نئی امداد، ماہانہ 250 یورو تک
Screenshot
کاتالونیا کی علاقائی حکومت (جنرالیتات) نے اعلان کیا ہے کہ وہ آئندہ 29 جون سے نوجوانوں کے لیے کرائے کی نئی مالی امداد کی اسکیم شروع کرے گی۔ یہ امداد اُن افراد کے لیے ہوگی جن کی عمر 31 جنوری تک 35 سال یا اس سے کم تھی اور جو کسی مکان یا کمرے کے کرایہ دار ہیں۔
اس امداد کی رقم ہر درخواست گزار کی آمدنی اور کرائے کے بوجھ کے تناسب کے مطابق ہوگی، جو کم از کم 20 یورو سے لے کر زیادہ سے زیادہ 250 یورو ماہانہ تک ہو سکتی ہے۔ حتمی رقم کا انحصار مکان یا کمرے کے مقام پر بھی ہوگا۔ درخواستیں جمع کرانے کا عمل 10 جولائی سے شروع ہوگا۔
اس منصوبے کے لیے کل بجٹ 26.8 ملین یورو رکھا گیا ہے۔ حکام کے مطابق یہ امداد خاص طور پر اُن نوجوانوں کے لیے ہے جو ریاستی “بونو الکویلر خووین” (Bono Alquiler Joven) حاصل نہیں کر سکے، تاکہ انہیں رہائش میں زیادہ سہولت اور تحفظ فراہم کیا جا سکے۔
ریاستی بونو الکویلر خووین (Bono Alquiler Joven)
یہ ایک سرکاری امداد ہے جس کے تحت 18 سے 35 سال کے نوجوانوں کو 24 ماہ تک ماہانہ 250 یورو تک دیے جاتے ہیں، بشرطیکہ ان کی سالانہ آمدنی تقریباً 25,200 یورو سے کم ہو۔ اس کے لیے کرائے کی حد عام طور پر مکان کے لیے 600 یورو اور کمرے کے لیے 300 یورو مقرر ہے، تاہم بعض علاقوں میں یہ حد بڑھا کر 900 اور 450 یورو تک کی جا سکتی ہے۔
یہ امداد دیگر ہاؤسنگ منصوبوں کے ساتھ بھی حاصل کی جا سکتی ہے، اور مجموعی طور پر کرائے کا 75 فیصد تک حصہ کور کیا جا سکتا ہے۔ تاہم یہ سبسڈی “پہلے آئیے، پہلے پائیے” کی بنیاد پر دی جاتی ہے۔
کاتالونیا میں اس سے قبل مارچ میں “بو لوگیر خووین” کے نام سے اسی نوعیت کی ایک اسکیم شروع کی گئی تھی، جس کا بجٹ 29 ملین یورو تھا۔ اس میں کرائے کی زیادہ سے زیادہ حد علاقے کے لحاظ سے مختلف تھی، مثلاً بارسلونا میٹروپولیٹن ایریا میں 900 یورو (مکان) اور 450 یورو (کمرہ) تک۔
36 سے 64 سال کے افراد کے لیے امداد
35 سال سے زائد عمر کے افراد (36 سے 64 سال) کے لیے بھی الگ امداد موجود ہے، جو 50 سے 200 یورو ماہانہ تک ہوتی ہے۔ اس کے لیے سالانہ آمدنی کی حد تقریباً 36,279 یورو رکھی گئی ہے۔
حالیہ بجٹ میں اضافے کے بعد اس پروگرام کے لیے مجموعی فنڈ 300 ملین یورو تک پہنچ گیا ہے، اور اندازہ ہے کہ 2026 میں تقریباً 145,000 خاندان اس سے فائدہ اٹھا سکیں گے۔
About The Author
