بارسلونا میں خواتین کی بے روزگاری کی تاریخی کم ترین شرح 5.6% کی سطح تک پہنچ گئی،مزید اعدادوشمار کیا کہتے ہیں؟

بارسلونا میں خواتین کی بے روزگاری کی شرح 5.6% تک پہنچ گئی ہے، جو کہ اب تک کی سب سے کم شرح ہے۔ یہ اعداد و شمار بارسلونا سٹی کونسل اور Barcelona Activa کی جانب سے شائع ہونے والی ایک رپورٹ کا سب سے مثبت پہلو ہے، جو 8 مارچ، خواتین کے عالمی دن سے صرف دو دن قبل جاری کی گئی۔ درحقیقت، یہ شرح کاتالونیا (9%)، اسپین (11.9%) اور یورپی یونین (6%) کی اوسط سے بھی کم ہے۔

بارسلونا کی سٹی کونسل کی رکن راکیل گل کے مطابق:بارسلونا میں بے روزگار افراد میں سے 55% خواتین ہیں۔ مزید برآں، اگر طویل مدتی بے روزگاری (12 ماہ سے زائد) پر نظر ڈالیں تو خواتین کا تناسب 59.7% تک بڑھ جاتا ہے۔ “یہ اعداد و شمار ظاہر کرتے ہیں کہ پالیسیز کام کر رہی ہیں۔ اتنی تیزی سے نہیں جتنا ہم چاہتے تھے، لیکن مثبت نتائج دے رہی ہیں۔”

رپورٹ میں یہ بھی واضح کیا گیا ہے کہ اہم عہدوں پر خواتین کی نمائندگی اب بھی کم ہے۔ اگرچہ کمپنیوں میں کام کرنے والی خواتین کی تعداد 40% سے زائد ہے، لیکن قیادت کے عہدوں پر صرف ہر چار میں سے ایک عہدہ خواتین کے پاس ہے۔

اسی طرح، غربت کے خطرے کا سامنا کرنے والی خواتین کی شرح 40.5% ہے، جبکہ مردوں میں یہ شرح 30% سے بھی کم ہے۔

مردوں اور خواتین کے درمیان تنخواہ کا فرق

2023 میں بارسلونا میں کام کرنے والی خواتین کی اوسط سالانہ تنخواہ 32,377 یورو تھی، جو کہ مردوں کی اوسط تنخواہ 38,407 یورو سے 15.7% کم ہے۔ اگرچہ پچھلے 10 سالوں میں تنخواہ کا فرق 10 پوائنٹس کم ہوا ہے، پھر بھی یہ مسئلہ مکمل طور پر حل نہیں ہوا۔

رپورٹ کے مطابق، خواتین کی اکثریت گھریلو کاموں (83.3%) اور صحت و سماجی خدمات (74.5%) جیسے شعبوں میں کام کرتی ہیں، جہاں تنخواہیں کم اور کام کا تحفظ محدود ہوتا ہے۔ اس رجحان کو “چپکنے والی زمین” (Sticky Floor) کہا جاتا ہے، جہاں خواتین کم تنخواہ والے اور کم درجہ کے کاموں میں محدود رہ جاتی ہیں۔

یہ عدم مساوات پنشن میں بھی نظر آتی ہے۔ خواتین کو کم تنخواہ ملنے کے باعث ریٹائرمنٹ کے بعد ان کی پنشن بھی کم ہوتی ہے۔ اس وقت پنشن میں جینڈر گیپ 32.7% ہے، جو کہ مرد و خواتین کی تنخواہوں کے فرق (15.7%) سے دوگنا زیادہ ہے۔ خاص طور پر، مردوں کی ریٹائرمنٹ پنشن خواتین کی بیوگی پنشن سے تقریباً دوگنا زیادہ ہے۔

اگرچہ بارسلونا میں خواتین کی بے روزگاری کی شرح تاریخی طور پر کم ترین سطح پر پہنچ چکی ہے، لیکن صنفی عدم مساوات اب بھی برقرار ہے۔ قیادت میں خواتین کی شمولیت، تنخواہ کا فرق، اور ریٹائرمنٹ کے بعد پنشن کی عدم مساوات جیسے مسائل حل طلب ہیں۔