بارسلونا،مکانوں کے مہنگے کرایوں کے خلاف ہزاروں افراد سڑکوں پر نکل آئے

بارسلونا(دوست نیوز)ہفتے کے روز بارسلونا کے پلاسا ہسپانیہ میں بارہ ہزار افراد (پولیس کے مطابق) جبکہ منتظمین کے مطابق ایک لاکھ افراد نے سستے اور قابل برداشت رہائشی مکانات کے حق میں مظاہرہ کیا اور مہنگے کرایوں کے خلاف احتجاج کیا۔

یہ مظاہرہ “کرایہ داروں کی یونین” کی جانب سے منعقد کیا گیا، جس نے اسپین کے تقریباً 40 شہروں میں اسی طرح کے مظاہروں کی کال بھی دی۔

احتجاج کے آغاز پر کرایہ داروں کی یونین کی ترجمان، کارمے آرسارازو نے کہا کہ کرائے “اب بھی آسمان کو چھو رہے ہیں” اور حکومتوں نے اس مسئلے پر “کچھ نہیں کیا”۔

انہوں نے مزید کہا: “مالک مکان قصوروار ہیں، مگر حکومتیں ذمہ دار ہیں۔”

رہائش کا بحران “ایک تنازعہ” ہے

آرسارازو نے موسمی کرایوں پر قابو نہ پانے پر بھی تنقید کی اور کہا کہ رہائش کا بحران “کوئی بہت پیچیدہ مسئلہ نہیں” بلکہ “ایک تنازعہ” ہے۔

“صرف منظم ہو کر، سڑکوں پر نکل کر اور ڈٹے رہ کر ہم کامیاب ہو سکتے ہیں۔”

انہوں نے لا کائیشا کے خلاف جاری کرایہ ہڑتال کو بھی سراہا اور خبردار کیا کہ اگر ضرورت پڑی تو وہ اس ہڑتال کو مزید وسعت دیں گے۔

اس مظاہرے کا مقصد “رہائش کے حق کے لیے جدوجہد کرنے والے اصل کرداروں” کو اجاگر کرنا تھا، جن میں وہ رہائشی بھی شامل تھے جنہوں نے لا کائیشا کی ملکیت میں موجود مختلف رہائشی منصوبوں میں کرایہ ہڑتال کا آغاز کیا ہے، مونتکادا ای ریعک میں غیر رسمی بستیوں کے رہائشی، اور وہ کرایہ دار جو عارضی کرایوں کے خلاف منظم ہو چکے ہیں۔یہ مظاہرہ 23 نومبر کو ہونے والے بڑے مظاہرے کے بعد دوسرا بڑا اجتماع تھا۔

کرایہ داروں کی یونین نے کہا کہ یہ تحریک “اختتام نہیں بلکہ آغاز ہے”، اور یہ صرف “ایک دن کے لیے سڑکوں پر نکلنے” کی بات نہیں ہے۔

ان کے مطابق، اس تازہ احتجاجی کال کو 4,000 سے زائد تنظیموں کی حمایت حاصل ہوئی، جن میں تعلیمی ادارے، خواتین کے حقوق کی تنظیمیں، صحت کے کارکنان، ماحولیاتی تنظیمیں، اور “بے دخلی کے خلاف فائر فائٹرز” جیسی انجمنیں شامل تھیں۔

یونین نے یہ بھی بتایا کہ 23 نومبر کے بعد سے اس کی رکنیت میں 25 فیصد اضافہ ہوا ہے، جو 4,621 سے بڑھ کر 5,711 ہو گئی ہے، اور اسپین کے دیگر شہروں جیسے ویلنسیا، سیویل، کادیس، گواڈالاخارا، اور آستوریاس میں نئی شاخیں قائم ہو گئی ہیں۔

CCOO اور UGT یونینز کی حمایت

CCOO اور UGT یونینز نے بھی اس مظاہرے میں شرکت کی اور کرایوں میں کمی کے مطالبے کی حمایت کی، کیونکہ ان کے مطابق رہائش کا بحران تمام مزدوروں کو متاثر کرتا ہے۔

” CCOO کاتالونیا کے جنرل سیکریٹری خاویئر پاچیکو نے میڈیا سے بات کرتے ہوئے کہا۔“آپ کھانے اور چھت کے بغیر زندہ نہیں رہ سکتے،انہوں نے مزید کہا: “باعزت رہائش کے لیے تحریک ایک ایسی لہر ہے جسے روکا نہیں جا سکتا۔”

UGT کے جنرل سیکریٹری، کامیل روس نے کہا: “جیسے ہمیں باعزت روزگار کی ضرورت ہے، ویسے ہی ہمیں باعزت رہائش کی بھی ضرورت ہے،” اور کرایہ کی قیمتوں اور معاہدوں کے دورانیے میں “سیکیورٹی اور استحکام” کی ضرورت پر زور دیا۔

“مالک مکان ہونا کوئی پیشہ نہیں ہے” – مظاہرے میں اٹھائے گئے ایک پوسٹر کا پیغام۔