چوروں نے الیکٹرانک آلات چرالئے،کرسمس کی خوشیاں ماند پڑگئیں،کرسمس لائٹس شو منسوخ

اسپین کے شہر قادس میں کرسمس کی خوشیاں اس وقت ماند پڑ گئیں جب پیر کی رات ایک چوری کے واقعے کے بعد شہر کا مشہور کرسمس لائٹس شو منسوخ کرنا پڑا۔ بلدیہ کے مطابق نامعلوم افراد نے روشنیوں اور آواز کے نظام کو کنٹرول کرنے والے چار میں سے تین کمپیوٹرز چوری کر لیے، جس کے باعث شو کا انعقاد ممکن نہ رہا۔

واقعے کا انکشاف شو شروع ہونے سے کچھ ہی دیر قبل ہوا۔ بلدیہ قادس کے مطابق پلازہ سان خوان دے دیوس میں نصب تکنیکی کیبن کو زبردستی کھولا گیا، جہاں سے وہ الیکٹرانک آلات چرائے گئے جو شو کے لیے ناگزیر تھے۔ اس توڑ پھوڑ کے نتیجے میں متوقع تقریب منسوخ کر دی گئی۔

لائٹنگ کے انتظام کی ذمہ دار کمپنی نے تصدیق کی ہے کہ تین کمپیوٹرز اور چار چارجرز چوری ہوئے ہیں، جو روشنی اور ساؤنڈ سسٹم کے کنٹرول کے لیے ضروری تھے۔

فی الحال شو غیر معینہ مدت کے لیے معطل کر دیا گیا ہے، تاہم بلدیہ اور متعلقہ کمپنی جلد از جلد اسے بحال کرنے کے لیے کام کر رہی ہیں۔ روزانہ تین مرتبہ پیش کیا جانے والا یہ لائٹس شو قادس کی کرسمس تقریبات کی ایک بڑی کشش سمجھا جاتا ہے۔