البیول نے نئے سال کے پیغام میں سابق تعلیمی ادارے B9 کے انخلا کو نظرانداز کر دیا

بادالونا کے میئر زاویئر گارسیا البیول نے اپنے نئے سال کے پیغام میں شہر میں آنے والی تبدیلیوں اور ترقیاتی منصوبوں پر تو بھرپور بات کی، تاہم سابق تعلیمی ادارے B9 سے تارکین وطن کے انخلا اور اس کے بعد پیدا ہونے والی صورتحال کا کوئی براہِ راست ذکر نہیں کیا۔

بلدیاتی ٹیلی وژن پر نشر ہونے والے اپنے خطاب میں میئر نے کہا کہ بادالونا میں اب تبدیلی محسوس کی جا سکتی ہے اور یہ تبدیلی “واضح بہتریوں” کی صورت میں سامنے آ رہی ہے۔ ان کے مطابق سال 2026 شہر کی تبدیلی کے “استحکام” کا سال ہوگا۔ انہوں نے کہا کہ دس برس بعد پہلی بار شہر میں سرکاری سرمایہ کاری ہو رہی ہے اور محلوں، سڑکوں اور بلدیاتی تنصیبات کی بہتری کا عمل تیزی سے جاری ہے۔

البیول نے مختلف ترقیاتی منصوبوں میں سب سے زیادہ زور پونت دل پترولی (Pont del Petroli) کی مرمت پر دیا، جسے انہوں نے شہر کے لیے علامتی اہمیت کا حامل قرار دیا۔ ان کا کہنا تھا کہ 2026 وہ سال ہوگا جب نیا پونت دل پترولی حقیقت بن جائے گا۔ اس کے علاوہ آئندہ مہینوں میں سڑکوں کی مرمت اور اسفالٹنگ، باغات اور پارکوں کی بہتری، نیز ثقافتی، کھیلوں کے مراکز اور بلدیاتی مارکیٹوں کی تجدید کا بھی اعلان کیا گیا۔

میئر نے شہر کے نئے صفائی نظام کا بھی خصوصی ذکر کیا، جو اس سال کنٹریکٹ کی منظوری کے بعد نافذ کیے جانے کی توقع ہے۔ اس منصوبے کے لیے سالانہ بجٹ 45 ملین یورو تک ہوگا۔ البیول کے مطابق شہری اس سے گلیوں میں “گہری اور واضح” تبدیلی محسوس کریں گے۔

تاہم اپنے پورے خطاب میں انہوں نے سابق انسٹی ٹیوٹ B9 کے انخلا کا کوئی واضح حوالہ نہیں دیا، حالانکہ یہ واقعہ کاتالونیا میں تارکین وطن کی سب سے بڑی بستی کے خاتمے کے باعث نہ صرف مقامی بلکہ قومی سطح پر بھی خبروں کا مرکز رہا ہے۔ سیکورٹی پر بات کرتے ہوئے البتہ انہوں نے عمومی انداز میں کہا کہ “جو بھی ہماری شہر میں کام کرنے، معاشرے کا حصہ بننے اور عوامی جگہوں کا احترام کرنے آئے، وہ خوش آمدید ہے۔”