’گوپی بہو‘ نے دوست کی لاش امریکا سے واپس لانے کیلئے مودی سے اپیل کردی
بھارتی اداکارہ دیوولینا بھٹاچرجی نے امریکا میں قتل ہونے والے دوست کی لاش واپس بھارت لانے کےلیے بھارتی وزیراعظم نریندر مودی سے اپیل کردی۔
سماجی رابطے کی ویب سائٹ ایکس پر اپنے بیان میں دیوولینا بھٹاچرجی کا کہنا تھا کہ انکے دوست امرناتھ گھوش نامی شخص کو ریاست میسوری کے شہر سینٹ لوئس میں فائرنگ کرکے قتل کردیا گیا تھا۔
انہوں نے بتایا کہ انکے دوست اپنے خاندان کے واحد کفیل تھے، انکی والدہ تین سال پہلے چل بسی تھیں جبکہ والد انکے بچپن میں فوت ہوگئے تھے۔
دیوولینا بھٹاچرجی نے یہ بھی لکھا کہ انکے دوست کو قتل کرنے والے ملزم سے متعلق معلومات سامنے نہیں آئیں اور نہ ہی اسکے محرکات سامنے آئے۔
انہوں نے لکھا کہ امرناتھ گھوش کے خاندان میں کوئی نہیں ہے جو انکے لیے لڑ سکے، صرف دوست ہی ہیں جو انکے لیے لڑ سکتے ہیں۔
دیوولینا نے اپنے ٹوئٹ میں بتایا کہ امرناتھ ایک بہت اچھے ڈانسر تھے، وہاں پی ایچ ڈی کر رہے تھے، ایک شام وہ چہل قدمی کےلیے نکلے تو انہیں نامعلوم افراد کی جانب سے فائرنگ کرکے قتل کردیا گیا۔
انہوں نے لکھا کہ امریکا میں کچھ دوستوں نے پولیس سے انکی لاش کی حوالگی کا کہا لیکن انہیں جواب نہ ملا۔
دیوولینا نے امریکا میں بھارتی سفارتخانے، بھارتی وزیراعظم نریندر مودی اور وزیر خارجہ جے شنکر کو ٹیگ کرتے ہوئے اس معاملے کو دیکھنے کی درخواست کی۔
واضح رہے کہ اداکارہ دیوولینا بھٹاچرجی نے مشہور زمانہ ٹیلی ویژن سیریل ’ساتھ نبھانا ساتھیا‘ میں گوپی بہو کے کردار سے شہرت پائی۔
