بارسلونا میں عوامی نرخوں پر ‘کالسوتس’ کھانے کا مزہ: کھلے آسمان تلے ہونے والی بڑی کیلسیوتاداس کی مکمل فہرست

بارسلونا/ جنوری کے آخری اتوار سے کیلسیوتادا کا باضابطہ سیزن شروع ہو جاتا ہے، اور اس کا اعلان ہوتا ہے کیلسیوتس کے شہرِ آغاز، والس (Valls) سے، جسے ان مشہور پیازوں کا کیلومیٹر زیرو کہا جاتا ہے۔

25 جنوری کو والس میں گران فیستا دے لا کیلسیوتادا منعقد ہو رہی ہے، جو اس سال اپنی 44ویں سالگرہ منا رہی ہے۔ یہ ایک بھرپور عوامی میلہ ہے جہاں پورا شہر انگاروں، بھنی ہوئی پیازوں کی خوشبو اور روایتی کاتالان ماحول میں ڈوب جاتا ہے۔ گلیوں اور چوراہوں پر سرگرمیوں کی بھرمار ہوتی ہے، کہیں یہ مقابلہ کہ کون زیادہ کیلسیوتس کھا سکتا ہے، کہیں کاستیلرز کی نمائش، اور ہر طرف باربی کیو، چکھنے کے اسٹال اور ڈھیروں کیلسیوتس یہ تہوار کاتالان روایت کا ایسا جشن ہے کہ واپسی پر “ایلز سگادورز” گنگناتے ہوئے آئیں گے۔

والس کے بعد یہ روایت پورے کاتالونیا میں پھیل جاتی ہے، حتیٰ کہ بھیڑ بھاڑ اور سیاحوں سے بھرے بارسلونا میں بھی۔ ایک دن کے لیے ساگرادا فامیلیا کے آس پاس کی مصروف سڑکیں بھی کیلسیوتس کے نام ہو جاتی ہیں۔ سردی ہو یا نہ ہو، رومیسکو ساس کے ساتھ خوب کھانے کا بہانہ تیار ہے۔

بارسلونا میں عوامی کیلسیوتاداس کا سب سے بڑا مرکز حسبِ روایت سانتس کا علاقہ ہے۔ اس سال پہلی کیلسیوتادا 18 جنوری کو ہو چکی ہے۔ آئندہ تاریخیں یوں ہیں:

31 جنوری کو کین باتیو اور پلازا خوان پیلیگری،

14 فروری کو کالیے وایادولید،

21 فروری کو کالیے مونتفار،

28 فروری کو دوبارہ کین باتیو،

1 مارچ کو کاسال خاوما کومتے،

اور 8 مارچ کو کالیے خوکس فلورالس میں کیلسیوتادا منعقد ہوگی۔

یہ ذوق صرف سانتس تک محدود نہیں۔ نو بارس میں 21 فروری، گراسیا میں 28 فروری اور 14 مارچ، ساگرادا فامیلیا میں 7 مارچ، لیس کورتس اور ایشامپل میں 14 مارچ، جبکہ کلوت میں 15 مارچ کو عوامی کیلسیوتاداس ہوں گی۔

اگر آپ عوامی جشن کے ساتھ کچھ زیادہ نفیس ذائقہ بھی چاہتے ہیں تو واٹ دی فوك! باربی کیو فیسٹیول کا رخ کریں، جو 21 اور 22 فروری کو لا اوہسپیتالیت کے پارک دے لا گران ویا میں ہوگا۔ یہاں معروف شیفس کی نگرانی میں گوشت، آرتچوک اور ہزاروں کیلسیوتس انگاروں پر تیار کیے جائیں گے۔

اسی طرح 7 اور 8 مارچ کو سان میگوئل گیستروفیسٹ KM0 پوبلے اسپانیول میں منعقد ہوگا، جہاں مقامی پیداوار سے تیار کردہ پکوان، جن میں کیلسیوتس بھی شامل ہیں، پیش کیے جائیں گے۔ انتخاب اتنا وسیع ہوگا کہ کوئی بھی بھوکا نہیں رہے گا۔