بارسلونا میں پاکستانی، بھارتی، بنگلہ دیشی اور الجزائری شہریوں کے ’’گم شدہ‘‘ پاسپورٹس،نیشنل پولیس اور موسس پولیس تحقیقات کریں گی

بارسلونا/گزشتہ چند ہفتوں سے اسپین کی مختلف سفارت گاہوں اور قونصل خانوں کے باہر تارکینِ وطن کی طویل قطاریں دیکھی جا رہی ہیں۔ یہ صورتحال وزیرِاعظم پیدرو سانچیز کی حکومت کی جانب سے غیر معمولی ریگولرائزیشن کے اعلان کے بعد سامنے آئی ہے، جس کے تحت غیر ملکی شہریوں کو قانونی حیثیت دینے کی تجویز دی گئی ہے۔ اسپین میں اس نوعیت کی مہم نئی نہیں، اس سے قبل بھی چھ مرتبہ ایسی ریگولرائزیشن ہو چکی ہے، آخری بار 2005 میں۔ تاہم اس بار، ElCaso.com کو موصول ہونے والی معلومات کے مطابق، پولیس نے خطرے کی گھنٹی بجا دی ہے۔

موسوس د’اسکوادرا پولیس کی مختلف تھانوں میں ایک غیر معمولی صورتحال سامنے آئی ہے۔ پولیس ذرائع کے مطابق صرف ایک ہفتے سے کچھ زائد عرصے میں پاسپورٹ گم ہونے کی شکایات میں نمایاں اضافہ ریکارڈ کیا گیا ہے۔ مجموعی طور پر ہزاروں پاسپورٹس کے گمشدہ ہونے کی رپورٹس درج کی گئی ہیں، جن میں اکثریت پاکستانی، بھارتی، بنگلہ دیشی اور الجزائری شہریوں کی ہے۔ اسی عرصے میں قونصل خانوں کی جانب سے تین ہزار سے زائد سرٹیفکیٹس بھی جاری کیے گئے ہیں، جن میں تصدیق کی گئی ہے کہ متعلقہ شہریوں کے پاسپورٹس ضائع ہو چکے ہیں۔

یہ اعداد و شمار ایسے وقت سامنے آئے ہیں جب اسپین میں ریگولرائزیشن پر بحث میں تیزی آئی ہے۔ شکایات کی تعداد اور ان کا مختصر مدت میں سامنے آنا پولیس اداروں کے لیے تشویش کا باعث بن گیا ہے اور داخلی سطح پر الرٹس جاری کیے گئے ہیں۔ اگرچہ دستاویزات کا گم ہو جانا بذاتِ خود کوئی غیر قانونی عمل نہیں، تاہم پولیس کے مطابق اتنی بڑی تعداد میں، وہ بھی قلیل عرصے میں، ایسی رپورٹس کا سامنے آنا اور ان کا ممکنہ قانونی تبدیلیوں سے جڑنا کم از کم سوالات ضرور کھڑے کرتا ہے۔ اسی وجہ سے یہ جاننے کے لیے تحقیقات شروع کر دی گئی ہیں کہ اصل میں ہو کیا رہا ہے۔

پولیس ذرائع کا کہنا ہے کہ پاسپورٹ کے غائب ہو جانے کے بعد اس کی دوبارہ درخواست دینے سے ملک میں قیام کی مدت کی تصدیق مشکل ہو جاتی ہے، جبکہ قیام کی مخصوص مدت پوری ہونا ریگولرائزیشن کی ایک بنیادی شرط ہے، جس پر PSOE اور پودیموس کے درمیان اتفاق ہوا ہے۔ شکایت درج کراتے وقت اگر یہ بیان دے دیا جائے کہ آٹھ ماہ سے زیادہ عرصہ اسپین میں گزارا جا چکا ہے، چاہے حقیقت میں ایسا نہ ہو، تو نیا سرکاری دستاویز حاصل ہونے کے بعد اس غیر معمولی عمل سے فائدہ اٹھایا جا سکتا ہے۔

تحقیقات سے جڑے ذرائع یہ بھی امکان ظاہر کر رہے ہیں کہ پاسپورٹ کی گمشدگی سے کسی فرد کی مکمل شناخت، اس کے اصل ملک یا سابقہ انتظامی ریکارڈ کی جانچ بھی مشکل ہو سکتی ہے۔ اسی تشویش کے پیشِ نظر اسپین کی نیشنل پولیس کی یونٹ UCRIF (غیر قانونی امیگریشن اور جعلی دستاویزات کے خلاف مرکزی یونٹ) نے موسوس د’اسکوادرا کے ساتھ مل کر اس معاملے کی تفتیش شروع کر دی ہے تاکہ یہ معلوم کیا جا سکے کہ اس اچانک اضافے کے پیچھے کیا عوامل ہیں اور اس کے نظام پر کیا اثرات پڑ سکتے ہیں۔

ووسیلر ایڈووکیٹس کے کریمنل ڈیپارٹمنٹ کے سربراہ وکیل دینیئل سالوادور کے مطابق پاکستانی کمیونٹی “انتہائی منظم” ہے۔ ان کے بقول، حالیہ ہفتوں میں قونصل خانوں میں رش نے یہ بات واضح کر دی ہے۔ ان کا کہنا ہے کہ یہ محض ایک مفروضہ ہے، تاہم ممکن ہے کہ پاسپورٹ گم ہونے کی شکایات میں اضافہ ریگولرائزیشن کے عمل کو آسان بنانے کی کوشش سے جڑا ہو، چاہے وہ قیام کی مدت غلط ظاہر کرنے کے لیے ہو یا پولیس کی سابقہ شناختوں اور گرفتاریوں سے جان چھڑانے کے لیے۔

سالوادور وضاحت کرتے ہیں کہ جب پاسپورٹ کی گمشدگی کی رپورٹ درج کرائی جاتی ہے تو بعض ایسے پولیس کیسز، جو ابھی عدالتی فیصلے تک نہیں پہنچے، انتظامی خلا کا شکار ہو سکتے ہیں۔ اگر دستاویز دستیاب نہ ہو تو بعض شناختیں یا گرفتاریاں واضح طور پر کسی فرد سے منسلک نہیں رہتیں اور یوں ریکارڈ سے غائب ہو سکتی ہیں۔ تاہم وہ یہ بھی واضح کرتے ہیں کہ حتمی فوجداری ریکارڈ اس سے متاثر نہیں ہوتا، کیونکہ وہ ایک الگ قانونی نظام کے تحت چلتا ہے۔ ان کے مطابق ماضی کی ریگولرائزیشن مہمات میں بھی کئی افراد نے پہلے پولیس ریکارڈ ختم کروانے کی کوشش کی تاکہ وہ اس عمل کے اہل بن سکیں۔

وکیل کا یہ بھی کہنا ہے کہ حکومت کی تجویز میں ابہام پایا جاتا ہے، کیونکہ اس میں “غیر اہم” فوجداری مقدمات رکھنے والوں کو بھی ریگولرائز کرنے کی بات کی گئی ہے، مگر یہ واضح نہیں کیا گیا کہ “غیر اہم” سے کیا مراد ہے۔ ایسے میں پاسپورٹ کی گمشدگی کی رپورٹ بعض شناختوں یا گرفتاریوں سے خود کو الگ کرنے کا ذریعہ بن سکتی ہے، اور ذمہ داری کسی ایسے فرد یا دستاویز پر ڈال دی جاتی ہے جو اب موجود ہی نہیں۔

پولیس ذرائع ایک اور تشویش کی طرف بھی اشارہ کرتے ہیں، اور وہ ہے غیر رسمی مشاورتی نیٹ ورکس کا ممکنہ وجود، جو لوگوں کو پاسپورٹ گم ہونے کی رپورٹ درج کرانے کا مشورہ دے رہے ہیں تاکہ ریگولرائزیشن کے مراحل آسان ہو سکیں۔ ان کے مطابق یہ نیٹ ورکس لازمی طور پر منظم جرائم پیشہ گروہ نہیں، بلکہ غیر قانونی دلالوں یا غیر رجسٹرڈ مشیروں پر مشتمل ہو سکتے ہیں۔

ElCaso.com نے اس صورتحال پر سماجی تنظیموں اور اینٹی ریسزم گروپس سے رابطہ کیا، تاہم بیشتر نے یہ کہتے ہوئے کوئی واضح رائے دینے سے انکار کر دیا کہ ان کے پاس مصدقہ اعداد و شمار موجود نہیں ہیں۔

وزارتِ داخلہ نے تاحال اس ممکنہ صورتحال پر کوئی باضابطہ مؤقف اختیار نہیں کیا، جو موسوس د’اسکوادرا کی تھانوں میں دباؤ کا باعث بن رہی ہے اور جسے ابتدائی مفروضوں میں غیر ملکیوں کی ریگولرائزیشن کے عمل میں ممکنہ بڑے پیمانے کی دھوکہ دہی قرار دیا جا رہا ہے۔ نہ کوئی سرکاری بیان جاری ہوا ہے اور نہ ہی پولیس ذرائع کے فراہم کردہ اعداد و شمار کی تصدیق یا تردید کی گئی ہے۔

البتہ مختلف ذرائع اس بات پر متفق ہیں کہ اس بحث نے ایک بار پھر یہ سوال کھڑا کر دیا ہے کہ آیا انتظامیہ ایسے غیر معمولی عمل کو سنبھالنے کے لیے تیار ہے یا نہیں، اور یہ کہ انتظامی کنٹرول اور بنیادی انسانی حقوق کے تحفظ کے درمیان توازن کیسے قائم رکھا جائے۔

About The Author