بارسلونا میں ہفتہ کا دن مشکل: ٹریکٹروں کا احتجاج، رودالیز کے حق میں مظاہرے اور چینی نیا سال
Screenshot
بارسلونا میں ہفتہ 7 فروری کو شہریوں کے لیے نقل و حرکت خاصی مشکل ہو سکتی ہے۔ وجہ یہ ہے کہ شہر میں ایک ہی دن مختلف احتجاجی سرگرمیاں اور تقریبات منعقد ہو رہی ہیں، جو بالخصوص وسطی علاقوں میں ٹریفک کو متاثر کریں گی۔
ایک جانب کسانوں کی ٹریکٹر ریلی (ٹریکٹوراڈا) گران ویا پر محکمۂ زراعت کے سامنے جاری رہے گی، جو دوپہر کے اوائل تک متوقع ہے۔ اس موقع پر 14:30 بجے اجتماعی ظہرانے کا بھی اہتمام کیا گیا ہے۔ دوسری جانب رودالیاس کے بحران کے خلاف دو مظاہرے ہوں گے، ایک دوپہر 12 بجے روندہ دے سانت پیری پر اور دوسرا شام 5 بجے اسٹیشن دے فرانسہ کے باہر۔ اس کے ساتھ ساتھ پورے دن چینی نئے سال کی تقریبات بھی منعقد کی جائیں گی۔
بارسلونا کی نائب میئر، لایہ بونیت نے صورتحال کو “ایک مشکل ہفتہ” قرار دیتے ہوئے شہریوں سے صبر و تحمل کی اپیل کی ہے۔ سٹی کونسل نے نجی گاڑیوں کے استعمال سے گریز اور میٹرو کو ترجیح دینے کی سفارش کی ہے۔ ان کے مطابق بسوں کا نظام متاثر ہو سکتا ہے، اس لیے میٹرو اس دن بہترین متبادل ہوگا۔
رودالیز کے بحران کے باعث صبح کے اوقات میں ٹریفک میں اضافہ ریکارڈ کیا گیا ہے۔ نائب میئر کے مطابق صبح 6 سے 8 بجے کے درمیان بارسلونا کے داخلی راستوں پر ٹریفک میں 5 فیصد جبکہ رنگ روڈز پر 2 فیصد اضافہ دیکھا گیا۔ ان کا کہنا ہے کہ نجی گاڑی استعمال کرنے والے افراد شہر میں جلد پہنچنے کی کوشش کر رہے ہیں۔
جمعے کے روز میٹرو میں ٹکٹ ویلیڈیشنز میں 4 فیصد اضافہ بھی نوٹ کیا گیا، جبکہ بسوں کا نظام معمول کے مطابق کام کرتا رہا۔
کم اخراج والی گاڑیوں کے زون (ZBE) کے عارضی خاتمے کے حوالے سے سٹی کونسل کا کہنا ہے کہ تاحال اس کا اثر نہ ہونے کے برابر ہے۔ حکام کے مطابق شہر میں داخل ہونے والی گاڑیوں کی نوعیت میں کوئی نمایاں تبدیلی دیکھنے میں نہیں آئی۔
رودالیز کے بحران پر ہونے والے مظاہروں کے بارے میں نائب میئر نے کہا کہ سٹی کونسل ان مظاہروں کی وجوہات کو سمجھتی ہے اور ابتدا ہی سے اس معاملے پر سخت مؤقف اپنائے ہوئے ہے۔ ان کا کہنا تھا کہ حالات کی بہتری کے لیے سرمایہ کاری ناگزیر ہے، اور یہی واحد راستہ ہے جس سے معمولاتِ زندگی بحال ہو سکتے ہیں۔
About The Author
