سانچیز کا فیخو پر عوام میں “افراتفری” اور “کشیدگی” پھیلانے کے لیے جھوٹ بولنے کا الزام، کہا: “شرم کرو”

میڈرڈ /وزیراعظم پیدرو سانچیز نے بدھ کے روز کانگریس میں خطاب کرتے ہوئےوعدہ کیا ہے کہ جنوری میں ایداموز (قرطبہ) اور جیلیدا (بارسلونا) میں پیش آنے والے ہولناک ریلوے حادثات کی مکمل اور سخت جانچ کی جائے گی، اور اگر ضرورت پڑی تو ذمہ داروں کو انصاف کے کٹہرے میں لایا جائے گا۔ ان حادثات میں مجموعی طور پر 47 افراد جان کی بازی ہار گئے تھے۔

سانچیز نے کہا،“ہم پوری دیانت اور سختی سے تحقیقات کریں گے، شفافیت کے ساتھ عوام کو آگاہ رکھیں گے اور ایسے تمام اقدامات کریں گے تاکہ آج جس سانحے پر ہم سوگوار ہیں، وہ دوبارہ پیش نہ آئے۔”

وزیراعظم نے یہ گفتگو ایوان میں اپنی حالیہ بین الاقوامی سرگرمیوں اور فورمز میں شرکت پر بریفنگ دینے کے ساتھ ساتھ ریلوے سروس کی موجودہ صورتحال اور حالیہ حادثات پر وضاحت پیش کرتے ہوئے کی۔

امیگریشن پر ووکس کو تنقید کا نشانہ

اجلاس کے دوران سانچیز نے ووکس کے سربراہ سانتیاگو اباسکال کو آڑے ہاتھوں لیا اور ان پر امیگریشن سے متعلق “جھوٹ پھیلانے” کا الزام عائد کیا۔ انہوں نے کہا،

“اسپین میں کوئی فالتو نہیں، اگر کچھ زائد ہے تو وہ نفرت ہے۔”

سوشل میڈیا پر ایلون مسک پر تنقید

وزیراعظم نے سوشل میڈیا پلیٹ فارم ایکس کے مالک ایلون مسک کو بھی تنقید کا نشانہ بنایا اور کہا کہ سوشل نیٹ ورکس شہریوں، خصوصاً نوجوانوں کی ذہنی صحت کو نقصان پہنچا رہے ہیں۔

ان کا کہنا تھا، “ضرورت اس بات کی ہے کہ سوشل میڈیا پر کنٹرول لیا جائے، کیونکہ شہریوں اور خاص طور پر نوجوانوں کی ذہنی صحت کی قیمت پر منافع کمایا جا رہا ہے۔”

ووکس کو “روکنے” کا دعویٰ، پی پی پر طنز

سانچیز نے دعویٰ کیا کہ ان کی حکومت ووکس کے لیے “بند باندھنے” کا کردار ادا کر رہی ہے۔ انہوں نے پیش گوئی کی کہ اگر نشستیں پوری ہوئیں تو پیپلز پارٹی کے رہنما البرٹو نونیز فیخو ووکس کے ساتھ حکومت بنانے میں دیر نہیں لگائیں گے۔

اباسکال پر مالی شفافیت کا سوال

وزیراعظم نے اباسکال کو بدعنوانی پر دوسروں کو نشانہ بنانے پر تنقید کا نشانہ بناتے ہوئے کہا کہ وہ خود “بدعنوانی کے منصف” بنے پھرتے ہیں جبکہ ان کی اپنی تنخواہ کی تفصیلات واضح نہیں اور نوجوان تنظیم “ریوئیلتا” کی جانب سے چندہ فنڈز میں مبینہ بے ضابطگیوں کی تحقیقات جاری ہیں۔

کاتالونیا کے روڈالیس نظام پر “تاریخی قرض” کا اعتراف

سانچیز نے تسلیم کیا کہ کاتالونیا کے مضافاتی ریلوے نظام روڈالیس کی فنڈنگ میں ایک “تاریخی کمی” رہی ہے، جسے ان کے بقول موجودہ حکومت گزشتہ برسوں میں پورا کرنے کی کوشش کر رہی ہے، جبکہ ماضی میں اس شعبے کو نظر انداز کیا گیا۔

سانتیاگو حادثے پر پی پی پر الزام

انہوں نے 2013 میں سانتیاگو دی کومپوستیلا کے علاقے آنگروئیس میں پیش آنے والے الویہ ٹرین حادثے کا حوالہ دیتے ہوئے الزام لگایا کہ اس وقت کی حکومت نے شواہد چھپائے اور یورپی ریلوے ایجنسی کی رپورٹ کی اشاعت میں رکاوٹیں ڈالیں، جس میں تحقیقات کی خودمختاری پر سوال اٹھایا گیا تھا۔

کانگریس میں سانچیز کی تقریر کے دوران حکومت اور اپوزیشن کے درمیان سخت جملوں کا تبادلہ دیکھنے میں آیا، جس سے ایوان کا ماحول خاصا گرم رہا۔