خواتین پر تشدد کو بعض تنظیمیں سیاسی مقاصد کے لیے استعمال کرتی ہیں ،خواتین تنظیموں کی شدید تنقید

میڈرڈ/خواتین کی مختلف تنظیموں اور ماہرین نے اس بات پر شدید تشویش کا اظہار کیا ہے کہ صنفی تشدد کی متاثرہ خواتین کو سیاسی مقاصد کے لیے استعمال کیا جا رہا ہے، جس سے اس مسئلے کے خلاف جاری جدوجہد کا رخ تبدیل ہوتا دکھائی دے رہا ہے۔

رواں سال 2026 کے ابتدائی 50 دنوں میں 10 خواتین قتل کی جا چکی ہیں، جن میں ایک 12 سالہ بچی بھی شامل ہے جسے اس کے باپ نے اپنی ماں کے ساتھ قتل کر دیا۔ یہ اعداد و شمار 2021 کے بعد بدترین ہیں اور 2023 کے برابر ہیں۔ دونوں متاثرہ خواتین ریاست کے حفاظتی نظام VioGén میں شامل تھیں، تاہم اس کے باوجود ملزم، جس پر دور رہنے کا حکم بھی نافذ تھا، ان کے گھر پہنچ کر انہیں قتل کرنے میں کامیاب ہو گیا۔

اس واقعے کے باوجود بہت کم سیاستدانوں نے یہ سوال اٹھایا کہ ریاستی تحفظ کے باوجود یہ قتل کیسے ممکن ہوا۔ اسی طرح مرسیا میں ایک 38 سالہ مراکشی نژاد خاتون، سلمیٰ، کو اس کے ساتھی نے دو سال تک قید، تشدد اور زیادتی کا نشانہ بنایا، مگر اس پر بھی خاطر خواہ توجہ نہیں دی گئی۔

خواتین کی تنظیموں کا کہنا ہے کہ حالیہ دنوں میں سیاسی جماعتوں کے درمیان صنفی تشدد کے بعض واقعات کو لے کر ایک دوسرے پر الزامات اور تنقید کا سلسلہ جاری ہے، جس میں متاثرہ خواتین کو سیاسی ہتھیار کے طور پر استعمال کیا جا رہا ہے۔ بعض کیسز میں متاثرہ خواتین کی شناخت بھی افشا کی گئی، جس سے انہیں عوامی تنقید اور شکوک کا سامنا کرنا پڑا۔

صنفی تشدد کے خلاف سرگرم کارکن اور انا بیلا فاؤنڈیشن کی سربراہ آنا بیلا نے کہا کہ متاثرین کو مدد، تحفظ اور ساتھ کی ضرورت ہوتی ہے، نہ کہ سیاسی مقاصد کے لیے استعمال کیے جانے کی۔ انہوں نے سوال اٹھایا کہ اگر خواتین کو ذلت اور سیاسی استعمال کا خوف ہو تو وہ شکایت کیسے درج کروائیں گی۔

اعداد و شمار کے مطابق، خواتین کی جانب سے درج کرائی جانے والی شکایات میں بھی کمی آئی ہے، جو 2019 میں 23 فیصد سے کم ہو کر 2024 میں 17 فیصد رہ گئی ہے، جس کی ایک بڑی وجہ اداروں پر اعتماد میں کمی بتائی جا رہی ہے۔

صنفی تشدد کے ماہر میگوئل لورینتے نے خبردار کیا کہ متاثرہ خواتین کو دوبارہ ایک “شے” کی طرح استعمال کیا جا رہا ہے، جبکہ بعض شدت پسند حلقوں کی جانب سے صنفی تشدد کے وجود سے ہی انکار کے بیانیے کو فروغ دیا جا رہا ہے۔ اوسطاً ہر سال 58 خواتین اس تشدد کا شکار ہو کر جان سے ہاتھ دھو بیٹھتی ہیں۔

اعداد و شمار کے مطابق، اسپین میں روزانہ 1,140 جنسی حملے اور 189 زیادتی کے واقعات رپورٹ ہوتے ہیں، اور ماہرین کا کہنا ہے کہ اس مسئلے کے حل کے لیے توجہ متاثرہ خواتین کے بجائے مجرموں پر مرکوز کرنا ضروری ہے۔

ماہرین اور خواتین کی تنظیموں نے زور دیا ہے کہ صنفی تشدد ایک ساختی مسئلہ ہے، جس کا تعلق کسی ایک سیاسی نظریے سے نہیں بلکہ پورے معاشرتی نظام سے ہے۔ وزارتِ مساوات کے بحران کمیٹی نے بھی سفارش کی ہے کہ متاثرین کے تحفظ کو مضبوط بنایا جائے اور مجرموں کو جواب دہ ٹھہرایا جائے۔