اباسکال نے ناکام فوجی بغاوت سے متعلق خفیہ سرکاری فائلوں کو منظر عام پر لانے کے حکومتی اعلان کو “توہین” قرار دےدیا
Screenshot
ہسپانوی سیاسی جماعت VOX کے صدر سانتیاگو اباسکال نے 23 فروری 1981 کی ناکام فوجی بغاوت (23F) سے متعلق خفیہ سرکاری فائلوں کو منظر عام پر لانے کے حکومتی اعلان کو “توہین” قرار دیتے ہوئے کہا ہے کہ وزیر اعظم پیدروسانچز کے مبینہ “نائٹ کلب اور متبادل کاروباروں” سے متعلق معلومات بھی اسی طرح ظاہر کی جانی چاہئیں۔
کاستیا و لیون کے انتخابات کی مہم سے قبل میڈیا سے گفتگو کرتے ہوئے سانتیاگو اباسکال نے وزیر اعظم کی جانب سے 23F کے خفیہ کاغذات کو عام کرنے کے اعلان پر طنز کیا۔ انہوں نے کہا کہ ان کے نزدیک یہ اقدام “ایک توہین” ہے، اور وہ حکومت کی توجہ ہٹانے والی باتوں میں نہیں پڑیں گے۔
اباسکال نے طنزیہ انداز میں مطالبہ کیا کہ پولیس کے پاس موجود تمام معلومات کو بھی ظاہر کیا جائے، خصوصاً ان “ساؤناؤں اور متبادل کاروباروں” کے بارے میں، جن کے بارے میں ان کا دعویٰ ہے کہ انہوں نے وزیر اعظم کے سیاسی کیریئر کی مالی مدد کی۔
انہوں نے مزید کہا کہ عوام کو یہ بھی بتایا جائے کہ اسپین میں بجلی کا بلیک آؤٹ کیوں ہوا،
- ریلوے نظام کی مناسب دیکھ بھال کیوں نہیں کی گئی جس کے نتیجے میں 47 افراد ہلاک ہوئے،
- ویلینسیا میں سیلاب کے دوران پولیس کو فوری مدد کے لیے کیوں نہیں بھیجا گیا،
- اور فرانس اور ایل سلواڈور کی جانب سے پیش کی جانے والی بین الاقوامی امداد کیوں مسترد کی گئی۔
VOX کے صدر نے الزام لگایا کہ حکومت عوام کی توجہ حالیہ مسائل اور دہشت گردی سے ہٹانے کی کوشش کر رہی ہے۔ انہوں نے کہا کہ حکومت کو چاہیے کہ گزشتہ چھ برسوں میں ایداموز، ویلینسیا اور دیگر مقامات پر ہونے والے جرائم سے متعلق معلومات کو منظر عام پر لائے، نہ کہ “چالیس سال پرانے معاملات” کو موضوع بنائے۔
About The Author
