سپر مارکیٹ چین مرکادونا نے اہداف حاصل کرنے پر ملازمین میں بونس تقسیم کر دیے

اسپین کی معروف سپر مارکیٹ چین مرکادونا نے اپنے 112,000 سے زائد ملازمین کو اہداف حاصل کرنے پر مجموعی طور پر 780 ملین یورو بطور بونس تقسیم کر دیے ہیں، جس کے تحت کمپنی کے تقریباً 70 فیصد ملازمین کو اضافی طور پر 5,400 یورو ملے ہیں۔

میڈرڈ سے بدھ، 25 فروری 2026 کو جاری کردہ رپورٹ کے مطابق، مرکاڈونا نے ایک بار پھر اپنے ملازمین کے ساتھ وابستگی کا اعادہ کرتے ہوئے بتایا کہ وہ مختلف اقدامات کے ذریعے پہلے ہی اپنی افرادی قوت کی قوتِ خرید بہتر بنانے پر ایک ارب یورو سے زیادہ خرچ کر چکی ہے۔

کمپنی کے مالک خوان روئگ کی زیر قیادت اس سپر مارکیٹ چین نے بدھ کے روز اپنے منافع میں سے 780 ملین یورو بطور کارکردگی بونس تقسیم کیے۔ اس بونس کی صورت میں چار سال سے کم عرصہ کمپنی میں کام کرنے والے ملازمین کو دو اضافی ماہ کی تنخواہ کے برابر رقم دی گئی، جبکہ چار سال سے زیادہ سروس رکھنے والے ملازمین، جو کل عملے کا تقریباً 70 فیصد ہیں، کو تین ماہ کی اضافی تنخواہ کے برابر ادائیگی کی گئی۔

ان ملازمین کو آج مجموعی طور پر 7,250 یورو خالص ادا کیے گئے، جن میں 5,400 یورو بونس اور ان کی معمول کی ماہانہ تنخواہ شامل ہے۔

اس کے علاوہ، کمپنی نے اسپین میں مہنگائی کی شرح 2.9 فیصد اور پرتگال میں 2.2 فیصد اضافے کے پیش نظر تنخواہوں میں بھی اضافہ کیا ہے، جس پر سالانہ 125 ملین یورو خرچ ہوں گے۔

مزید برآں، گزشتہ دسمبر میں مرکادونا نے اپنے ملازمین کی چھٹیوں میں ایک ہفتے کا اضافہ کیا، جس کے بعد سالانہ چھٹیاں 30 دن سے بڑھا کر 37 دن کر دی گئی ہیں۔ یہ سہولت اسپین اور پرتگال دونوں میں نافذ ہو چکی ہے اور اس پر کمپنی کو سالانہ 100 ملین یورو خرچ کرنا پڑیں گے۔

مرکادونا کے مطابق، ان تمام اقدامات پر ایک ارب یورو سے زیادہ کی سرمایہ کاری اس بات کا ثبوت ہے کہ کمپنی کا انتظامی ماڈل ملازمین کے اطمینان کو اولین ترجیح دیتا ہے، کیونکہ وہی کمپنی کی کامیابی کا بنیادی ستون اور صارفین کی بہترین خدمت کے ضامن ہیں۔

کمپنی کا کہنا ہے کہ ملازمین پر سرمایہ کاری کے مثبت نتائج سامنے آئے ہیں، جس کے باعث 2025 میں مرکادونا نے منافع اور مارکیٹ شیئر کے لحاظ سے اپنی تاریخ کی بہترین کارکردگی حاصل کی۔