فالاس سے قبل والنسیا میں ہزاروں غیر قانونی آتش بازی کی اشیاء ضبط

گواردیا سول پولیس نے ویلنسیا نے میں فالاس تہوار کے آغاز سے قبل ایک بڑی کارروائی کرتے ہوئے 15,835 غیر قانونی اور غیر معیاری آتش بازی کی اشیاء ضبط کر لیں۔ حکام کے مطابق یہ کارروائی شہریوں کی حفاظت کو یقینی بنانے اور آتش بازی کی غیر قانونی فروخت کو روکنے کے لیے کی گئی۔

یہ کارروائی والنسیا کے ساتھ ساتھ ایلیکانتے اور کاستیون کے صوبوں میں بھی کی گئی، جہاں آتش بازی کی مصنوعات فروخت کرنے والے سات مختلف مراکز کا معائنہ کیا گیا۔ تفتیش کے دوران حکام نے دریافت کیا کہ بڑی مقدار میں آتش بازی کی اشیاء حفاظتی اصولوں کے خلاف ذخیرہ کی گئی تھیں، جو نہ صرف دکانداروں بلکہ عام شہریوں کے لیے بھی خطرناک ثابت ہو سکتی تھیں۔

حکام کے مطابق ضبط شدہ آتش بازی کا مجموعی وزن 52.73 کلوگرام (نیٹ ایکسپلوسیو کنٹینٹ) تھا۔ ان مصنوعات کو ضبط کرنے کا فیصلہ اس لیے کیا گیا کیونکہ یہ آتش بازی کے سرکاری ضابطوں پر پورا نہیں اترتی تھیں اور ان کی فروخت کے لیے ضروری اجازت نامہ بھی موجود نہیں تھا۔

گواردیا سیول نے واضح کیا کہ فالاس جیسے بڑے تہواروں سے قبل آتش بازی کی خریداری میں نمایاں اضافہ ہو جاتا ہے، جس سے غیر قانونی فروخت کے امکانات بھی بڑھ جاتے ہیں۔ اسی وجہ سے ہر سال ایسے خصوصی آپریشن کیے جاتے ہیں تاکہ عوام کی جان و مال کو کسی بھی ممکنہ خطرے سے محفوظ رکھا جا سکے۔

حکام نے شہریوں کو ہدایت کی ہے کہ وہ صرف مستند اور مجاز دکانوں سے آتش بازی کی اشیاء خریدیں اور ان کے استعمال کے دوران تمام حفاظتی ہدایات پر سختی سے عمل کریں۔ حکام کے مطابق ان قوانین پر عمل کرنا نہ صرف قانونی ذمہ داری ہے بلکہ اجتماعی سلامتی کے لیے بھی انتہائی ضروری ہے۔