حاجی اسد حسین کےوالدین کے لئے سالانہ ختم پاک کی محفل،قاری سید صداقت علی کی قرآت ونعت خوانی
بارسلونا(دوست نیوز)پاکستان مسلم لیگ ن اسپین کے صدر حاجی راجہ اسد حسین نے اپنے مرحوم والدین کی روح کے ایصال ثواب کے لئے مسجد عطار بارسلونا میں سالانہ ختم پاک کا اہتمام کیا۔
ختم پاک کا آغاز تلاوت قرآن مجید سے ہوا۔ قدیر احمد خان،محمد شوکت اویسی،سید شاہد رسول نے ہدیہ نعت پیش کیا۔جبکہ مولانارضوان عطاری نے عظمت والدین پر مختصر خطاب فرمایا۔
عالمی مبلغ قرآن صدارتی ایوارڈ یافتہ فخرالقراء قاری نیشنل اسمبلی و پاکستانی ٹیلی ویژن ایوارڈ یافتہ ہلال امتیاز تمغہ ستارہ امتیاز حسن کارکردگی قاری سید صداقت علی شاہ نے تلاوت قرآن مجید سے سماں باندھ دیا اور ہرزبان سبحانہ اللہ اور اللہ کبر سے معطرہوگئی۔
ختم پاک کی سالانہ محفل میں حاجی راجہ اسد حسین کی جانب سے ایک عمرہ کے ٹکٹ کا بھی اعلان کیا گیا،جو محمد عبداللہ کے نام نکلا اس موقع پر نعرہ تکبیر اللہ اکبر کے فلک شگاف نعرے بلند ہوئے اور محمد عبداللہ کو خوش قسمتی پر مبارک باد دی گئی
مسجد کا ہال نمازیوں سے بھرا ہوا تھا تمام مسلمانوں میں عشق رسول صلی اللہ علیہ والہ وسلم دیدنی تھا،قاری سید صداقت علی نے نماز مغرب کی امامت فرمائی اور دعا کرتے ہوئے کہا کہ اللہ سبحانہ تعالی فلسطین کو آزادی،مشرق وسطی کے حالات کو بہتر اور مسلمانوں میں اتحاد پیدا فرما،حاجی راجہ اسد حسین کے والدین اور تمام مومنین جو اس دنیا سے تشریف لے گئے ہیں ان سب کی مغفرت فرما آمین
حاجی راجہ اسد حسین کی جانب سے افطاری کے انتظامات کئے گئے تھے۔
About The Author
