بارسلونا، ہسپتال دیل مار میں پھیپھڑوں کے کینسر کی تشخیص کے لیے ایک زیادہ جدید اور درست ٹیکنالوجی شامل
Screenshot
ہسپتال دیل مار میں جدید ترین پیریفرل ایکوبروَنکوسکوپی (ecobroncoscòpia perifèrica) کا آلہ نصب کیا گیا ہے، جو مارکیٹ میں دستیاب جدید ترین نظام ہے، اور یہ اسپین میں اس نوعیت کا پہلا مرکز ہے جہاں اسے متعارف کرایا گیا ہے۔ ماہرین کے مطابق اس ٹیکنالوجی کی مدد سے پھیپھڑوں میں موجود چھوٹے اور ابتدائی مرحلے کے ٹیومرز کو زیادہ درستگی سے تلاش کیا جا سکتا ہے اور ان کی بایوپسی بھی ممکن ہو گئی ہے۔
یہ نیا نظام اُن حصوں تک بھی رسائی فراہم کرتا ہے جہاں پہلے پہنچنا مشکل تھا اور جہاں پہلے زیادہ پیچیدہ طریقے استعمال کرنا پڑتے تھے۔
ہسپتال کے مطابق اس آلے کا ایک بڑا فائدہ یہ ہے کہ بایوپسی عمل کے دوران ہی کی جا سکتی ہے، اور ڈاکٹر ہر وقت اس مقام کو دیکھ سکتے ہیں جہاں سے نمونہ لیا جا رہا ہے۔
ڈاکٹر البرت سانچیز فونت کے مطابق اس سے مریض کو بھی فائدہ ہوتا ہے کیونکہ آپریشن کا وقت کم ہو جاتا ہے، صرف ٹیومر نکالنا پڑتا ہے اور اضافی بایوپسی کی ضرورت نہیں رہتی، جس سے بعد از آپریشن پیچیدگیوں کا خطرہ کم ہو جاتا ہے۔
ماہرین کا کہنا ہے کہ یہ نئی ٹیکنالوجی پھیپھڑوں کے کینسر کی ابتدائی تشخیص میں اہم کردار ادا کرے گی، خاص طور پر اگر مستقبل میں اس بیماری کے لیے عوامی سطح پر اسکریننگ پروگرام شروع کیا جاتا ہے۔
یہ ہسپتال یورپ کا پہلا مرکز بھی بن گیا ہے جہاں اس ٹیکنالوجی کے ذریعے پھیپھڑوں کے کینسر کی تشخیص کی گئی۔
64 سالہ مریض، جو سگریٹ نوش تھا اور دیگر بیماریوں میں مبتلا تھا، میں 2025 میں ایک ماس (رسولی) پائی گئی۔ روایتی طریقوں سے تشخیص ممکن نہ تھی، لیکن نئے آلے کی مدد سے یہ ثابت ہوا کہ اسے نان اسمال سیل پھیپھڑوں کا کینسر ہے، جو آپریشن کے قابل تھا۔
About The Author
