بادشاہ فلیپے ششم اور ملکہ لیتیزیا کا میڈرڈ کے مزدور طبقے کے علاقے ویلیکاس کا دورہ

سپین کے بادشاہ فلیپے ششم اور ملکہ لیتیزیا نے بدھ کے روز میڈرڈ کے مزدور طبقے کے علاقے ویلیکاس کا دورہ کیا، جہاں ان کی آمد نے علاقے میں خاصی رونق پیدا کر دی۔ شاہی جوڑے نے انتریویاس میں واقع “پادری یانوس” کے نام سے منسوب ہاسپیٹیلٹی اسکول کا دورہ کیا، جو ایک مشہور مزدور پیشوا پادری José María de Llanos کی یاد میں قائم ہے۔ انہوں نے اپنی زندگی کا بڑا حصہ اسی علاقے کے غریب اور محنت کش لوگوں کی خدمت میں گزارا۔

یہ اسکول ایک عمارت میں قائم ہے جو 1961 میں مقامی لوگوں اور پادری یانوس نے مل کر نوجوانوں کو ہنر سکھانے کے لیے تعمیر کی تھی۔ سن 2001 سے یہ ادارہ باقاعدہ ہاسپیٹیلٹی اسکول کے طور پر کام کر رہا ہے، جہاں باورچی، ویٹر اور دیگر شعبوں کے پیشہ ور افراد تیار کیے جاتے ہیں۔

ملکہ لیتیزیا، جو خوراک اور غذائیت کےموضوعات میں خاص دلچسپی رکھتی ہیں، نے طلبہ سے بات چیت کرتے ہوئے اس شعبے میں معیار اور بہترین خدمات کی اہمیت پر زور دیا۔ شاہی جوڑے نے اسکول میں طلبہ کے تیار کردہ کھانے سے بھی لطف اٹھایا، جس میں خاص پکوان پیش کیے گئے۔

اگرچہ وقت کے ساتھ اس علاقے کی حالت میں بہتری آئی ہے اور جھونپڑیوں کا خاتمہ ہو چکا ہے، مگر اب بھی غربت اور سماجی مسائل مکمل طور پر ختم نہیں ہوئے۔ آج کل یہاں زیادہ تر آبادی دیگر ممالک سے آنے والے افراد پر مشتمل ہے، جن میں سے کئی معاشی مشکلات کا شکار ہیں۔

ملکہ نے اس موقع پر نیلے رنگ کی بلاؤز اور سفید پتلون زیب تن کی، جبکہ بادشاہ فلپے نے نسبتاً سادہ لباس اختیار کیا اور ٹائی نہیں پہنی۔

اس دورے کے دوران شاہی جوڑے نے Fundación José María de Llanos کے رجسٹر میں اپنے تاثرات بھی قلم بند کیے، جس میں انہوں نے سماجی ہم آہنگی اور انسانیت کے فروغ کے لیے ادارے کی کوششوں کو سراہا۔

بعد ازاں، بادشاہ اور ملکہ نے “ایسپاسیو مُخیر میڈرڈ (EMMA)” نامی مرکز کا بھی دورہ کیا، جو معاشرتی طور پر کمزور اور خاص طور پر گھریلو تشدد کا شکار خواتین کو رہائش، قانونی اور نفسیاتی مدد فراہم کرتا ہے۔ یہ مرکز 2013 میں قائم ہوا اور 2016 سے خواتین کے لیے رہائش، تربیت اور روزگار کے مواقع بھی فراہم کر رہا ہے۔