بارسلونا میں بڑے پولیس آپریشن میں عادی مجرموں کے خلاف کریک ڈاؤن، 100 گرفتار، سینکڑوں جرائم کا ریکارڈ سامنے آگیا

‘پلان کانپائی’ (Plan Kanpai) کے نام سے کیے گئے اس مشترکہ پولیس آپریشن میں، جس میں موسوس دی اسکوادرا، قومی پولیس اور مختلف مقامی پولیس فورسز نے حصہ لیا، ہفتہ 30 مئی کی صبح تک 100 افراد کو گرفتار کر لیا گیا جبکہ 19 دیگر کو زیرِ تفتیش رکھا گیا ہے۔ اس کارروائی کا بنیادی مقصد بار بار جرائم کرنے والے افراد (ملٹی ری اِنسیڈینسیا) کے خلاف گھیرا تنگ کرنا تھا، جو سڑکوں پر ہونے والے جرائم کی بڑی وجہ سمجھے جاتے ہیں۔

اس آپریشن کے دوران 2,000 سے زائد افراد کی شناخت کی گئی اور مختلف خلاف ورزیوں پر درجنوں جرمانے کیے گئے، جبکہ شہر اور اس کے مضافاتی علاقوں کے اہم مقامات پر سخت نگرانی کی گئی۔

 گرفتاریوں کے علاوہ پولیس نے بڑی تعداد میں اشیاء بھی ضبط کیں۔ مجموعی طور پر 110 جرمانے منشیات یا چاقو جیسے ہتھیار رکھنے پر کیے گئے، جبکہ 44 ٹریفک خلاف ورزیوں پر جرمانے عائد ہوئے۔

ٹریفک چیکنگ کے دوران 196 گاڑیوں کی جانچ پڑتال کی گئی، جس کے نتیجے میں 14 ذاتی نقل و حمل کے آلات (VMP) اور ایک کار ضبط کی گئی۔

میٹروپولیٹن ٹرانسپورٹ میں ٹکٹ فراڈ کے خلاف بھی کارروائی کی گئی، جہاں 263 انتظامی جرمانے کیے گئے۔

قومی پولیس نے 33 ایسے تارکین وطن کو بھی گرفتار کیا جن کے پاس اسپین میں رہائش کا اجازت نامہ نہیں تھا، اور ان سب کے خلاف مجموعی طور پر 262 مقدمات درج تھے۔

 بارسلونا شہر اس آپریشن کا مرکزی مرکز رہا، جہاں کل 45 گرفتاریاں ہوئیں۔ ان 45 افراد کے خلاف مجموعی طور پر 635 سابقہ جرائم کا ریکارڈ موجود تھا۔ ان پر ڈکیتی، چوری، منشیات سے متعلق جرائم، سزا کی خلاف ورزی اور غیر قانونی رہائش جیسے الزامات ہیں۔

اسی علاقے میں 1,004 افراد کی شناخت کی گئی، جن کے مجموعی طور پر 4,695 سابقہ جرائم سامنے آئے۔ مزید 15 افراد کو تفتیش کے دائرے میں لایا گیا۔

 میٹروپولیٹن نارتھ ایریا میں 32 افراد کو گرفتار کیا گیا، جن میں زیادہ تر بدالونا اور سانت آدریا دے بیسوس سے تھے (ہر شہر سے 13 گرفتاریاں)، جبکہ سانتا کولوما دے گرامینیت سے 6 افراد گرفتار ہوئے۔

دوسری جانب جنوبی علاقے میں 11 گرفتاریاں ہوئیں، ایک شخص زیرِ تفتیش ہے، اور 336 افراد کی شناخت کی گئی۔ یہاں کارروائیاں لوہسپیتالیت دے یوبریگات، کورنییا، ایسپلگیس، ایل پراٹ اور بارسلونا ایئرپورٹ کے اہم مقامات پر کی گئیں۔

About The Author