فیخوکا وزیراعظم سانچیز کو انتخابات کرانے کے لیے “ہمت” دکھانے کا چیلنج
میڈرڈ(دوست نیوز)پاپولر پارٹی کے رہنما البرتو نونیز فیخو نے اس اتوار کو ہسپانوی عوام سے اپیل کی ہے کہ وہ خاموش نہ رہیں اور موجودہ حکومت کی “انحطاط” کے خلاف “شرافت اور آزادی کی بغاوت” کے ذریعے سڑکوں پر آئیں جب تک کہ انتخابات نہ ہو جائیں۔ اس موقع پر انہوں نے وزیراعظم پیدرو سانچیز کو چیلنج دیا کہ وہ “ہمت” دکھائیں اور انتخابات کرائیں، نیز ان سے مطالبہ کیا کہ وہ “چھپنا” اور “فرار” ہونا بند کریں کیونکہ حکومت کے خلاف مبینہ کرپشن کے کیسز سامنے آ رہے ہیں۔
انہوں نے کہا:“ہسپانیہ کو ایک انقلاب کی ضرورت ہے، شرافت اور آزادی کا انقلاب۔ اور ہم اس انقلاب کی قیادت سڑکوں، اداروں اور بالآخر بیلٹ بکس تک کریں گے۔ اس انقلاب کے لیے جو آج سے شروع ہو رہا ہے، میں اپنے ملک کے تمام ایماندار اور آزاد شہریوں پر بھروسہ کرتا ہوں،” فیخو نے یہ بات پیپلز پارٹی کی جانب سے میڈرڈ کے پلازا دے ایسپانیا میں منعقدہ اجتماع میں کہی، جس کا عنوان تھا ‘مافیا یا جمہوریت’۔
فیخو کے مطابق، اس مظاہرے میں 100,000 سے زائد افراد شریک ہوئے، جہاں ان کے ساتھ پارٹی کے علاقائی رہنما اور سابق وزرائے اعظم خوسے ماریا اثنار اور ماریانو راخوئے بھی موجود تھے۔ تاہم، حکومت کی نمائندہ اتھارٹی (ڈیلیگاثیون دی گوویئرنو) نے یہ تعداد 50,000 بتائی ہے۔
اپنی تقریر میں فیخو نے وزیراعظم پیدرو سانچیز سے مطالبہ کیا کہ وہ “چھپنا بند کریں، جھوٹ بولنا بند کریں اور فرار ہونا بند کریں”۔ انہوں نے کہا:“ہسپانیہ تیار ہے، اور میں بھی تیار ہوں۔ بس اب یہ باقی ہے کہ آپ (سانچیز) ہمت کریں اور عوام سے رجوع کریں”۔
فیخو نے مزید کہا:“یہ بات محض سیاسی جماعتوں کے بارے میں نہیں ہے۔ اور میری خواہش ہے کہ باقی قائدین بھی جلد یہ بات سمجھ جائیں۔ یہ معاملہ اس سے کہیں زیادہ اہم ہے — یہ معاملہ شرافت، جمہوری وقار، اور خود ہسپانیہ کے بارے میں ہے۔ اور یہی وہ چیز ہے جس کے دفاع کے لیے ہم یہاں جمع ہوئے ہیں”۔
مظاہرے میں شریک ہزاروں افراد نے نعرے لگائے جیسے: “پیدرو سانچیز استعفیٰ دو” اور “جمہوریت، استعفیٰ”۔ اجتماع کے آغاز سے قبل صبح 11 بجے کے قریب، ڈی جے پُولپو نے موسیقی کے ساتھ عوام کا جوش بڑھایا اور وزیراعظم سانچیز پر “جھوٹ بولنے” کا الزام عائد کیا۔
About The Author
