اسپین بھر میں فلسطین کے حق میں لاکھوں افراد کی ریلیاں، میڈرڈ اور بارسلونا میں سب سے بڑے احتجاجی مظاہرے

میڈرڈ / بارسلونا (دوست مانیٹرنگ ڈیسک) 4 اکتوبر 2025/اسپین کے مختلف شہروں میں ہفتے کے روز فلسطین کے حق میں بڑے پیمانے پر احتجاجی مظاہرے کیے گئے۔ یہ مظاہرے ملک کے 70 سے زیادہ شہروں میں بیک وقت منعقد ہوئے، جن کا مقصد فلسطینی عوام کے ساتھ یکجہتی کا اظہار اور امریکہ کی جانب سے پیش کردہ “امن منصوبے” کے خلاف احتجاج تھا، جسے مظاہرین نے “قتلِ عام کو چھپانے کی چال” قرار دیا۔

میڈرڈ میں احتجاج سب سے بڑا رہا۔ منتظمین کے مطابق چار لاکھ جبکہ حکومتی اندازوں کے مطابق ایک لاکھ افراد شریک ہوئے۔ مظاہرین نے اسرائیل کے خلاف نعرے لگائے:“میرا دل غزہ کے ساتھ”، “یہ سیاست نہیں، انسانیت ہے”، “دنیا خاموش، فلسطین لہو لہان”، “غزہ! ہم تیرے ساتھ ہیں”۔

سڑکیں فلسطینی پرچموں، سیاہ کپڑوں اور “تربوز کے نشان” والے بیجز سے بھری ہوئی تھیں، جو فلسطینی پرچم کے رنگوں کی علامت ہیں۔

ویلینسیا میں تقریباً 10 ہزار افراد نے شرکت کی اور نعرے لگائے:“اسرائیل قاتل، اسپین مددگار”، “بائیکاٹ اسرائیل”، “آزاد فلسطین”۔

پامپلونا میں 50 ہزار مظاہرین (حکومت کے مطابق 10 ہزار) نے مارچ کیا۔ نعرے لگائے گئے:“غزہ، حوصلہ رکھ، دنیا جاگ رہی ہے”، “بائیکاٹ اسرائیل”، “زندہ باد فلسطینی مزاحمت”۔

پامپلونا کی ریلی میں صوبہ ناوارا کی صدر ماریا شیویتے بھی اپنے خاندان کے ساتھ شریک ہوئیں۔ مظاہرین نے اسرائیل کا پرچم جلایا اور 15 اکتوبر کو ہڑتالِ عام کی اپیل کی۔

ویگو میں بارش کے باوجود 40 ہزار افراد (پولیس کے مطابق 8 ہزار) نے شرکت کی اور نعرہ لگایا: “دریا سے سمندر تک، فلسطین جیتے گا”۔

سیویا میں ہزاروں افراد نے شرکت کی۔ ازکیردا یونیدا کے رہنما انتونیو مائییو نے اسرائیل کو “امن میں سب سے بڑی رکاوٹ” قرار دیا۔

مالاگا میں بھی درجنوں تنظیموں کی شرکت سے ریلی نکالی گئی۔
سانتاندیر میں ہسپتال والدے سییا کے گرد انسانی زنجیر بنائی گئی، جس میں سینکڑوں شہری اور طبی عملہ شریک ہوا۔ انہوں نے مطالبہ کیا کہ اسپین اسرائیل کے ساتھ تمام تعلقات ختم کرے اور فلسطینی زخمیوں کی میزبانی کرے۔

15 اکتوبر کو اسپین کی بڑی مزدور تنظیموں کمیسیونس اوبریراس (CCOO) اور یو جی ٹی (UGT) نے فلسطین کے حق میں دو گھنٹے کی علامتی ہڑتال کا اعلان کیا ہے، جبکہ کنفیڈریشن انترسندیکل گالیگا نے اسے چار گھنٹے تک بڑھا دیا ہے۔