بارسلونا میں متعدد بار جرائم کرنے والوں کے خلاف دسویں آپریشن میں 72 افراد گرفتار

بارسلونا میں موسوس دِ اِسکوادرا کی جانب سے پلان کانپائی کے تحت کیے گئے دسویں بڑے آپریشن میں 72 افراد کو مختلف جرائم میں ملوث ہونے پر گرفتار کر لیا گیا ہے۔ پولیس کے مطابق یہ وہ افراد ہیں جو مسلسل جرائم کو اپنے معمول اور کمائی کے طریقے کے طور پر استعمال کرتے ہیں۔

اس کارروائی کے دوران 35 افراد کو مزید تفتیش کے لیے نامزد کیا گیا ہے، جن کے مجموعی طور پر 197 سابقہ ریکارڈ ہیں۔ گرفتار شدگان کے پاس پہلے سے 577 مقدمات درج ہیں۔ اس کے ساتھ 74 ٹریفک خلاف ورزیوں کی کارروائیاں اور 147 انتظامی سزائیں بھی دی گئی ہیں، جن میں اسلحے اور منشیات برآمدگی کے معاملات شامل ہیں۔

آپریشن کے دوران 39 کاروباری اداروں کے خلاف مختلف نوعیت کی خلاف ورزیوں پر کارروائی کی گئی، جبکہ دو چوری شدہ گاڑیاں بھی برآمد کی گئیں۔ اس کارروائی میں کاتالونیا پولیس کے ساتھ مقامی، قومی اور نجی سیکیورٹی اہلکاروں نے بھی حصہ لیا۔

یہ اقدامات بارسلونا کے علاوہ بدالونا، سانتا کولومہ دی گرمنیت، سانت آدریا دیل بسوس (جس میں لا مینا کا علاقہ بھی شامل ہے)، لخوپسیتت، کورنییا، اِسپلوگس اور ایل پرات میں بھی کیے گئے۔ اسی طرح ایئرپورٹ ہوزیپ تاراادیاس اور فیگیریس (خیرونا) میں بھی کارروائیاں ہوئیں۔

موسوس کے ڈائریکٹر جنرل جوزپ لُئیز ترپیرو کے مطابق ان آپریشنز کا مقصد ایسے بار بار ہونے والے جرائم پر قابو پانا ہے جو براہ راست جان یا جنسی آزادی پر حملہ تو نہیں کرتے، لیکن بڑی تعداد میں شہریوں کو متاثر کرتے ہیں۔