بارسلونا میٹرو کا کرسمس شیڈول جاری، کرسمس ایو پر رات 11 بجے بند، نیو ایئر نائٹ پر پوری رات جاری

بارسلونا(دوست مانیٹرنگ ڈیسک) کرسمس اور سال نو کے موقع پر شہریوں کی نقل و حرکت کو آسان بنانے کے لیے ٹی ایم بی نے میٹرو سروس میں خصوصی تبدیلیوں اور اضافی ٹرینوں کا اعلان کیا ہے۔ کمپنی کے مطابق دسمبر کے ہفتہ وار تعطیلات اور ان دنوں میں جب تجارتی مراکز کھلے ہوں گے، میٹرو کی فریکوئنسی میں اضافہ کیا جائے گا۔

بدھ 24 دسمبر، کرسمس ایو کی شب، میٹرو رات 11 بجے بند ہو جائے گا، جبکہ نیو ایئر نائٹ پر میٹرو پوری رات بلا تعطل چلتی رہے گی۔ 25 دسمبر (کرسمس ڈے) اور 26 دسمبر (سانت استیو) کو میٹرو صبح 5 بجے سے رات 2 بجے تک چلائی جائے گی۔

L1، L2 اور L3 پر فریکوئنسی میں اضافہ

دسمبر کے ہفتہ، اتوار اور ان دنوں میں جب تعطیل کے باوجود کاروباری مراکز کھلے ہوں، لائنیں L1، L2 اور L3 خصوصی طور پر مضبوط کی جائیں گی۔ تجارتی علاقوں کے قریب اسٹیشنوں پر اضافی عملہ بھی تعینات ہوگا تاکہ بڑھتی ہوئی آمد و رفت کو سنبھالا جا سکے۔

ادارے کے مطابق 29 اور 30 نومبر، دسمبر کے تمام ہفتہ وار تعطیلات، اور 3 و 4 جنوری کو میٹرو ٹرینوں کی تعداد میں 7.4 فیصد اضافہ ہوگا۔ اس کے علاوہ 30 نومبر کو 102ویں “کُرسہ ژاں بوئیں” ریس کے موقع پر صبح کی مصروف اوقات (6 سے 10 بجے) میں ٹرینوں کی تعداد 5.7 فیصد بڑھا دی جائے گی۔

6 سے 8 دسمبر تک تعمیراتی کام

6 سے 8 دسمبر تک لائن L2 اور L4 پر مرمت و بہتری کے کام کے باعث سروس متاثر ہوگی۔ دیگر لائنوں پر 6 دسمبر کو، حسبِ معمول ہفتہ کی رات کی طرح، میٹرو پوری رات چلتی رہے گی۔

7 دسمبر کو سروس رات 2 بجے تک جاری رہے گی، جبکہ 8 دسمبر کو تعطیل کا معمول کا شیڈول نافذ ہوگا اور ٹرینیں رات 12 بجے تک چلیں گی۔