ویلنسیا میں “ہائو اِن اپوروس” کے ذریعے 4 لاکھ یورو سے زائد کا فراڈ ، 41 افراد گرفتار

پولیس نیشنل نے ویلنسیا صوبے میں 41 افراد کو گرفتار کیا ہے جن پر “ہائو اِن اپوروس” یعنی “بیٹا مشکل میں ہے” کے طریقۂ واردات سے 62 وارداتیں کرنے کا الزام ہے، جن کے ذریعے وہ 4 لاکھ 5 ہزار یورو سے زیادہ رقم ہتھیا چکے تھے۔ گرفتار شدگان میں 32 مرد اور 9 خواتین شامل ہیں۔

تحقیقات کے مطابق ملزمان میسیجنگ ایپ کے ذریعے والدین سے رابطہ کرتے تھے، خود کو اُن کے بیٹے کے طور پر ظاہر کرتے ہوئے یہ کہتے کہ وہ ایک ہنگامی صورت حال کا شکار ہیں اور اپنا فون استعمال نہیں کر سکتے، اس لیے کسی دوست کے فون سے رابطہ کر رہے ہیں۔ اسی بہانے وہ فوری طور پر پیسوں کا مطالبہ کرتے۔

پولیس نے بتایا کہ جب متاثرہ والدین رقم بھجوا دیتے تو ملزمان مزید بہانوں سے اضافی رقوم بھی اینٹھ لیتے اور بعض کیسوں میں یہ رقم بہت زیادہ ہو جاتی۔ تحقیقات ایک سال قبل اس وقت شروع ہوئیں جب مختلف علاقوں سے ایسی شکایات موصول ہوئیں۔

رقوم کے حصول کے لیے گروہ نے “مُولز” یعنی ایسے افراد استعمال کیے جو یا تو معمولی معاوضے کے بدلے اپنی بینک اکاؤنٹس فراہم کرتے تھے یا پھر جعلی آن لائن ملازمتوں کی پیشکش کے ذریعے پھنسائے جاتے تھے۔ انہیں فراڈ کی گئی رقم کا پانچ سے دس فیصد حصہ دینے کا لالچ دیا جاتا تھا۔ اسی طریقے سے ملزمان ٹرانزیکشن کا سراغ لگانا مشکل بنا دیتے تھے۔

پولیس نے دورانِ کارروائی ایسے دس افراد کو بھی گرفتار کیا جو “مُولز” کی بھرتی کرتے اور رقم کی نقل و حرکت کو سنبھالتے تھے۔ اب تک تقریباً 25 ہزار یورو مختلف بینک کھاتوں سے برآمد کر کے متاثرین کو واپس کیے گئے ہیں۔ پولیس کے مطابق اس گروہ کے خلاف ملک بھر میں درج 62 مقدمات کو آپس میں جوڑا گیا ہے اور کارروائی جاری ہے۔