آزادیٔ صحافت 2025: اسپین سات درجے بہتری کے بعد 23ویں نمبر پر، تاریخ کی بہترین پوزیشن
میڈرڈ(دوست نیوز)رپورٹرز ود آؤٹ بارڈرز کی 2025 کی عالمی درجہ بندی میں اسپین نے آزادیٔ صحافت کے حوالے سے سات درجے بہتری حاصل کر کے 23واں نمبر حاصل کیا، جو اس کی اب تک کی بہترین پوزیشن ہے۔ یہ بہتری سیاسی ماحول، صحافیوں کی سلامتی اور سماجی و ثقافتی حالات میں نسبتاً کم دباؤ اور کشیدگی کی وجہ سے سامنے آئی۔
رپورٹ کے مطابق 2024 میں صحافیوں پر حملوں میں کمی ہوئی، تاہم قانونی اور عدالتی دباؤ خصوصاً صحافیوں کے خلاف بے جا مقدمات بدستور ایک سنگین مسئلہ ہیں۔ معاشی لحاظ سے صحافت کا شعبہ کمزور ہی رہا، جہاں ملازمتوں کا عدم تحفظ اور میڈیا کی مالی مشکلات آزادیٔ صحافت کے لیے بڑا خطرہ بنی ہوئی ہیں۔
قانونی ماحول مجموعی طور پر بہتر ہونے کے باوجود بعض متنازعہ قوانین میں اصلاحات کی تاخیر اور سرکاری میڈیا کے انتظامی ڈھانچے میں تبدیلیوں پر تنقید کی گئی ہے۔ عالمی سطح پر رپورٹ یہ بھی بتاتی ہے کہ دنیا کے بیشتر ممالک میں آزادیٔ صحافت کی صورتحال بگڑ رہی ہے، جس کے مقابلے میں اسپین کی کارکردگی نسبتاً بہتر رہی۔
RSF کی عالمی درجہ بندی 2025 میں ناروے پہلے، ایسٹونیا دوسرے اور نیدرلینڈز تیسرے نمبر پر ہیں، جبکہ چین (178)، شمالی کوریا (179) اور اریٹریا (180) آزادیٔ صحافت کے حوالے سے فہرست کے آخری نمبروں پر موجود ہیں
About The Author
