بارسلونا کے رہائشیوں کے لیے 2026 میں ساگرادا فامیلیا کے ٹکٹوں پر 50 فیصد رعایت
بارسلونا(دوست نیوز)ساگرادا فامیلیا کی تاریخی عبادت گاہ نے سال 2026 کی مناسبت سے بارسلونا کے رہائشیوں کے لیے ایک خصوصی رعایتی اسکیم کا اعلان کیا ہے۔ اس منصوبے کے تحت یکم جنوری سے 31 دسمبر 2026 تک شہر میں مقیم افراد کو کسی بھی انفرادی ٹکٹ پر 50 فیصد رعایت دی جائے گی، بشرطیکہ وہ اپنی رہائش کا باقاعدہ ثبوت فراہم کریں۔
ساگرادا فامیلیا انتظامیہ کے مطابق اس اقدام کا مقصد شہریوں کو 2026 میں ہونے والی اہم تاریخی تقریبات میں شامل کرنا ہے، جن میں معمار انتونی گاؤدی کی وفات کی صد سالہ برسی اور یسوع مسیح کے مینار کی تکمیل شامل ہے، جو مرکزی میناروں میں آخری ہوگا۔
ہر بکنگ میں زیادہ سے زیادہ نو ٹکٹ شامل کیے جا سکتے ہیں، تاہم شرط یہ ہے کہ تمام افراد بارسلونا کے رہائشی ہوں۔ رعایتی ٹکٹ حاصل کرنے کے لیے کم از کم ایک شخص کو resident@ext.sagradafamilia.org پر ای میل کے ذریعے درخواست بھیجنی ہوگی، جس کے ساتھ تمام افراد کی بارسلونا میں رہائش ثابت کرنے والی دستاویزات منسلک کرنا ہوں گی۔
درخواست کے ساتھ شناختی کارڈ (DNI) کی کاپی یا میونسپل رجسٹریشن (پادرون) کا ثبوت دینا ضروری ہوگا۔ اس کے علاوہ، تمام افراد کو دورے کے دن یہ دستاویزات ساتھ لانا ہوں گی تاکہ رہائشی ہونے کی تصدیق کی جا سکے۔
یہ رعایتی ٹکٹ یکم جنوری سے 31 دسمبر 2026 کے درمیان دستیاب ہوں گے اور رعایت کا اطلاق اس وقت دستیاب ٹکٹوں پر ہوگا۔ اس اسکیم میں شامل ٹکٹوں کی چار اقسام یہ ہیں:
- ساگرادا فامیلیا
- ساگرادا فامیلیا مع مینار
- ساگرادا فامیلیا مع مینار اور گائیڈڈ ٹور
- ساگرادا فامیلیا مع گائیڈڈ ٹور
واضح رہے کہ یہ ٹکٹ نہ آن لائن خریدے جا سکتے ہیں اور نہ ہی براہِ راست مقام پر دستیاب ہوں گے۔ تمام ٹکٹ ذاتی، نامزد اور ناقابلِ منتقلی ہوں گے۔ اس لیے رعایت حاصل کرنے والا شخص یہ ٹکٹ کسی دوسرے فرد کو، چاہے وہ بھی بارسلونا کا رہائشی ہو، منتقل یا تحفے میں نہیں دے سکتا۔
About The Author
