بارسلونا کے شہریوں کے لیے رہائش کا حصول سب سے بڑا مسئلہ قرار

بارسلونا میں رہائش کا حصول شہریوں کے لیے سب سے بڑا مسئلہ بن کر سامنے آیا ہے۔ بلدیہ کی جانب سے جاری کیے گئے میونسپل بیرو میٹر کے دوسرے مرحلے کے سروے کے مطابق 32.8 فیصد شہریوں نے اسے شہر کا سب سے اہم مسئلہ قرار دیا ہے۔ اگرچہ یہ مسئلہ پہلے بھی نمایاں تھا، مگر گزشتہ بیرو میٹر کے مقابلے میں اس شرح میں تین اعشاریہ پوائنٹس کا اضافہ ہوا ہے۔

فہرست میں دوسرے نمبر پر شہری سلامتی ہے، جسے 25.2 فیصد جواب دہندگان نے اہم مسئلہ قرار دیا۔ اس کے بعد شہر کی صفائی کا مسئلہ ہے، جس پر 6.8 فیصد شہریوں نے تشویش ظاہر کی۔

یہ نتائج میونسپل ڈیٹا آفس کی جانب سے 17 سے 30 نومبر 2025 کے درمیان کی گئی 803 انٹرویوز پر مبنی ہیں۔

بیرو میٹر کی ایک نمایاں بات یہ ہے کہ سیاحت سے متعلق مسائل تشویش کے اعتبار سے پانچویں نمبر پر آ گئے ہیں۔ اس وقت صرف 4.1 فیصد شہریوں نے سیاحت کو اہم مسئلہ قرار دیا، جو گزشتہ سروے کے مقابلے میں 5.7 پوائنٹس کی کمی ہے۔

اس کے برعکس، امیگریشن سے متعلق مسائل اب چوتھے نمبر پر آ گئے ہیں۔ اس حوالے سے معمولی اضافہ دیکھا گیا ہے اور 6 فیصد جواب دہندگان نے اسے شہر کا بڑا مسئلہ بتایا ہے۔

بیرو میٹر کے مطابق تقریباً 90 فیصد شہری، یعنی 87.4 فیصد، غیر مہذب رویوں کے خلاف سزاؤں کو مزید سخت کرنے کے حق میں ہیں۔ یہ وہی اقدامات ہیں جو حال ہی میں بلدیہ کی جانب سے منظور کی گئی نئی بلدیاتی آرڈیننس میں شامل کیے گئے ہیں۔

بلدیہ کے مطابق حالیہ مہینوں میں نافذ کی گئی بعض پالیسیوں کو بھی وسیع حمایت حاصل ہے۔ مثال کے طور پر، 70 فیصد شہری دائیگونل ایونیو پر ٹرام کی توسیع کے حامی ہیں، جبکہ 60 فیصد بارسلونا میں لنگر انداز ہونے والے کروز جہازوں کی تعداد محدود کرنے کو مثبت اقدام سمجھتے ہیں۔