کم از کم سات خودمختار خطوں کے صدور 2026 میں تنخواہیں بڑھائیں گے

میڈرڈ(دوست نیوز)اسپین کے کم از کم سات خودمختار خطوں کے صدور نے 2026 میں اپنی تنخواہوں میں اضافے کا ارادہ ظاہر کیا ہے۔ یہ اضافہ سرکاری ملازمین کے لیے طے شدہ تنخواہی اضافے کے مطابق ہوگا۔ ان میں استوریاس، کانتابریا، باسک کنٹری، ناوارا، لا ریوخا، کاستیا و لیون اور کاستیا لا مانچا کے صدور شامل ہیں۔

مختلف خودمختار خطوں کے بجٹس کا جائزہ لینے سے معلوم ہوتا ہے کہ اگرچہ کئی خطوں نے ابھی تک 2026 کے لیے اپنے بجٹس پیش نہیں کیے، تاہم مذکورہ سات خطوں کے صدور نے اپنی تنخواہوں کو سرکاری ملازمین کی مجوزہ تنخواہی بڑھوتری سے منسلک کرنے کا فیصلہ کیا ہے۔

مرکزی حکومت نے حال ہی میں ایک فرمان کے ذریعے اعلان کیا ہے کہ سرکاری ملازمین کی تنخواہوں میں 2025 کے لیے 2.5 فیصد اور 2026 کے لیے دو فیصد تک اضافہ کیا جائے گا۔ اسی فارمولے کو ان خودمختار خطوں کے صدور اپنی تنخواہوں پر لاگو کرنے کا ارادہ رکھتے ہیں۔

مرکزی حکومت نے تاحال 2026 کے بجٹ کا مسودہ پیش نہیں کیا، جس کے باعث وزیر اعظم پیدرو سانچیز کی سالانہ تنخواہ فی الحال 90,010.20 یورو ہے، جو ماہانہ 7,500 یورو بنتی ہے۔

جن صدور کی تنخواہوں میں اضافے کی توقع ہے ان میں ادریان باربون (استوریاس)، ماریا خوسے سائنز دے بوروآگا (کانتابریا)، ایمانول پرادالیس (باسک کنٹری)، ماریا چیویتے (ناوارا)، گونزالو کاپییان (لا ریوخا)، الفونسو فرناندیز ماںیوئیکو (کاستیا و لیون) اور ایمیلیانو گارسیا پیخ (کاستیا لا مانچا) شامل ہیں۔

مثال کے طور پر استوریاس کے صدر ادریان باربون کی سالانہ تنخواہ 72,979 یورو ہے جو 2026 میں ریاستی اجازت کے مطابق بڑھ جائے گی۔ کانتابریا کی صدر کی 2025 میں تنخواہ 71,835.12 یورو تھی، جس میں بھی اسی تناسب سے اضافہ متوقع ہے۔

ناوارا کی صدر ماریا چیویتے اس وقت 83,381.76 یورو سالانہ (چودہ اقساط میں) وصول کرتی ہیں اور ان کی تنخواہ بھی سرکاری پالیسی کے تحت بڑھ سکتی ہے۔

اس کے برعکس، میڈرڈ، کینری جزائر اور گالیسیا وہ واحد خطے ہیں جہاں اب تک صدور کی تنخواہیں منجمد رکھنے کا فیصلہ کیا گیا ہے۔

میڈرڈ کی صدر ایزابیل دیاث آیوسو پچھلے پندرہ برس سے ایک ہی تنخواہ لے رہی ہیں، اگرچہ ان کی سالانہ آمدن ان خطوں میں سب سے زیادہ ہے، جو تقریباً 103,090 یورو بنتی ہے۔

کینری جزائر کے صدر فرناندو کلیویخو 76,823 یورو سالانہ وصول کریں گے، جبکہ گالیسیا کے صدر الفونسو روئیدا کی تنخواہ 85,743 یورو سالانہ رہے گی۔

ابھی بھی کئی خودمختار خطے ایسے ہیں جنہوں نے 2026 کے بجٹس پیش نہیں کیے یا جن کے بجٹس میں واضح طور پر یہ نہیں بتایا گیا کہ صدور یا اعلیٰ حکام کی تنخواہوں میں اضافہ ہوگا یا نہیں۔

دیگر صدور کی موجودہ سالانہ تنخواہیں مختلف ہیں، تاہم تمام خودمختار خطوں میں سب سے زیادہ تنخواہ کاتالونیا کے صدر سالوادور اییا کو ملتی ہے، جن کی سالانہ آمدن اس وقت 136,177.5 یورو ہے، جبکہ 2026 کے بجٹ کا ابھی انتظار ہے۔